區內有不少印有區議會會徽的設施
原作者：黃大仙區議員（正愛）岑宇軒博士
編輯：Mini、Cola
黃大仙區議會會徽老是常出現，不論係地區設施、區議會文件以及宣傳品等，都經常會見到。不過各位街坊又知唔知我哋個會徽係點樣嚟同有咩意思呢？
除左睇返相關法例、到訪中文大學圖書館，我亦去到歷史檔案館翻查資料。現時嘅《區議會條例》入面並冇會徽相關嘅條文，而此條例係一九八一年通過，我就將目標鎖定喺該年嘅憲報上面。結果只係搵到當年委任黃大仙區議員嘅名單，都係冇會徽。會唔會係成立咗區議會之後先傾個會徽呢？於是即場申請查閱相關會議紀錄，終於畀我搵到答案。
原來一九八一年第一次區議會會議時，已經傾過舉辦會徽設計比賽，其後第二次會議就通過採用冠軍作品為正式會徽，哩個就係黃大仙區議會會徽嘅起源喇。
我再次查閱設計嘅象徵意義，會徽中間嘅牌坊係黃大仙廟，而一段東方日報嘅剪報亦寫到：「黃大仙區議會下設五個委員會，分別為社區建設、環境事務、寮屋區事務、財務、交通及運輸事務。而代表黃大仙區議會的會徽由藍色之圓形及半圓形組成，圓形內一個紅色牌坊代表黃大仙社區，圓形外伴以五個半圓形，象徵區議會及其小組。」只不過今日黃大仙區議會已經發展到有六個委員會，下面再有不同工作小組，同五個半圓嘅原意不符。
1981年11月東方日報剪報
另外我覺得最失色嘅地方係會徽外圍有一圈黑色字寫住「黃大仙區議會 W.T.S. DISTRICT COUNCIL」，令成個設計變得複雜，而最容易辨認出係黃大仙區嘅牌坊反而只佔中間一少部份，再者英文名仲要因為唔夠位而只能用簡寫「W.T.S.」，可見哩個設計並非太理想。
值得注意嘅係，首次區議會選舉喺一九八二年先舉行，但黃大仙區議會會徽係一九八一年由被委任嘅區議員加政府官員決定，以依家嘅眼光嚟睇，過程係未有足夠民意支持。適逢今年係區議會成立四十周年，而且今日大家對區議會已經熟悉咗好多，不失為一個再次舉辦黃大仙區議會會徽設計比賽嘅好時機。以當今發達嘅通訊科技，要做到全區一人一票選出冠軍作品亦肯定比以往容易得多。