（獨媒報導）2021年12月19日，立法會選舉投票日。
主流民主派沒有參與選舉，很多過往在選舉日參選助選的成員，與其他市民一樣，視12月19日為藉公共交通機構「自願」提供免費乘車的機會、到處走走的「大日子」。
出戰新界西南的荃灣區議員的獨立民主派劉卓裕，在12月19日則背上一支號角到處拉票。他偶爾朝天吹奏，寓意相當直白，就是「勝利」。最終結果未如劉卓裕預期，他只獲得12,828票大敗而回，「我真係太天真，追求民主嘅同路人對香港政制太失望，我扭轉唔到」，號角聲戛然而止。
號角聲
12月19日，早上七時許。
劉卓裕出門前先向上帝禱告，祈求選戰順利，「做到就捱多四年，做唔到就可以放假」。他掛在背上的不是直幡或大聲公，而是一支由教會弟兄贈送的以色列號角。走到荃灣福來邨時，他舉起號角用力吹氣，「嗰首歌（願榮光歸香港）就聽得多，但呢個就係號角聲啦」，號角的寓意十分直白——「勝利」。
開始拉票前，劉卓裕先到酒樓飲早茶，茶樓內隱約聽到「二號」（民建聯陳恒鑌）、「三號」（工聯會陳穎欣）的窸窣討論聲，他轉身向全場喊道「大家記得投我，一號劉卓裕！」同桌的茶客笑著點頭，卻出奇不意問道「你係獨立嘅？你唔係民主派啊嘛？」，劉笑說「你考驗我喎，梗係民主派啦」，茶客回應「哦～咁啲後生會投你啦」。劉卓裕搖頭，指年輕人不認同新選舉制度，「我成日都覺得共產黨好叻，唔選又唔掂，選又唔公義」。
民主派的選民一直冷待選舉，過往屬選舉焦點的選舉論壇，會留意的幾乎都是建制派選民。論壇上，「民主派」的候選人被視為沙包圍攻，被問到的「敏感」問題幾乎都無力回應。劉卓裕坦言過程十分辛苦，「盡咗力，畀自己10分（滿分）」
「早晨啊，我係一號卓卓」，他向屬於自己區議會選區範圍的荃景花園居民揮揮手，「一世都見唔到陳恒鑌，唔好投啲從來冇見過嘅人」。他視這一區為自己票倉，「其實呢個區都一定好穩」。劉卓裕再朝樓上吹起號角，聲音初時斷斷續續，如同票站外忽多忽少的人流，劉嘆道「少咗好多人，上次區議會嗰時，呢個時候，條街已經爆晒」。
詩歌
劉卓裕自小歸信基督，逢星期日都會參與崇拜，選舉當日亦不例外，早站後花兩小時參與。唱過詩歌後，他出席第一場為自己安排的記者會，記者不約而同皆問：「點睇民主派同路人嘅批評，乃至有人呼籲杯葛選舉？」劉的回應亦大同小異：民主派光譜很闊，堅信自己是其中一員。
劉卓裕在咪後向《獨媒》記者坦言，同路人的批評聲音比想像中多，惟他嘗試放開一點看，「我見到嘅取態係，大部分人選擇唔出聲，係有一啲人會出聲，嗰啲人either係好深黃，或者離開咗香港嘅人。」「我明白流亡咗嘅同事係好傷心、好灰心，但請你話返畀我聽，仲可以做到啲乜嘢？參選係我唯一可以做到嘅嘢。」他苦笑「兄弟爬山，各自努力不復見於今次選舉。對於杯葛或投白票，劉卓裕表示「呢一刻好似好開心，但如果陳穎欣入咗去，之後四年點樣捱呢？」，「杯葛派攞咗道德高地，但佢哋講唔到next step，參選派參選立法會，但就攞唔到道德高地」。
李洪波
願意站出來支持劉卓裕的民主派屈指可數，荃灣區議會前副主席民主黨李洪波是其中一人。
自稱「主選派」的李洪波表示，與劉共事近兩年，認為其作為符合「民主派」定義。李洪波又形容劉卓裕是有心人，「有心在民主路上努力，不過從政經驗比較少，議政能力有改善空間」，「喺電視辯論都見到，政制方面，佢嘅把握未係完全充分，可以再熟書啲。」。
港台論壇上，劉卓裕未能說出普選涉及哪一條《基本法》，又被追問「公民提名」與條文中的「提名委員會」有矛盾。李洪波說這其實是一個好問題，認為調和兩者正正是非建制派立法會議員的主要任務，「係我對劉卓裕、對所有非建制派議員嘅期望」。
公關
劉卓裕為人所知的，是2018年的九巴工潮，哥哥劉卓恆的妻子葉蔚琳是九巴月薪車長大聯盟的召集人，並發起工潮，本身是公關的劉卓裕在背後支持。首次萌生從政一念是在2019年初，他巧遇時任建制派荃灣區議員與一眾食衛署職員在跟進鼠患問題，「當時仲心諗，咦，民建聯咁好嘅」，惟後來發現問題不見紓緩，認為是「打卡當做咗」的典型建制派作風，「哇，呢啲咁嘅⋯⋯都做到八年區議員，咁不如我做啦」。 他在荃灣「愉景」打大佬成功，以4,498票擊敗立法會議員田北辰，當選荃灣區議員。
2020年立法會選舉，劉卓裕要第二次為自己擔任公關，但今次不再如2019年般「容易」。
自他宣布有意參選後，在他的Facebook留言區，幾乎是一面倒的批評，有聲稱是中學師弟的網民批評他政綱空洞，有區議員同事嘲諷他獲中聯辦配票、出賣民主派。
他為自己制定的公關策略是，「我唔會答，亦都唔洗理會，做好自己嘢就得」。《獨媒》記者問到，擔任其他公眾人物例如明星的公關，必然需要顧及網民評論，但搞選舉就無需顧及？他回應道，娛樂圈有人會出錢請人「帶風向」，但他並不會如此。
五光十色
中午記者會過後，他坐上好友的開篷老爺車，在荃灣與葵青的街巷間穿梭、喊口號。立法會選舉地方直選的投票率雖然偏低，但新界西南的投票率一直領先全港，在傍晚已迫近三成，令劉卓裕一度頗為樂觀，想像著議會有五光十色的可能。
然而隨著時間一點一滴過去，劉卓裕已預計勝算渺茫。午夜12時許，劉卓裕來到會展的新聞中心時，狀甚疲倦，「係咪會有奇蹟出現㗎…相差好遠喎…」。《獨媒》記者在他視為票倉的「愉景」觀看點票，結果他亦告落敗，民建聯陳恒鑌得1,368票，工聯會陳穎欣得1,486票，劉卓裕只得668票。
「愉景都係佢哋多啊？咁我真係可以退出政壇，唉，都好，感謝主」，他苦笑指目前打算便是回家睡覺。
劉卓裕嘆道，「我太天真，真係太天真，追求民主嘅同路人對香港政制太失望，我扭轉唔到」。 他決定未來專注區議會工作，對於會否想方法修補與民主派的關係，劉表示順其自然，「冇咩修唔修補，每人諗法唔同……」對於未來「清一色」的立法會，他則只想說一聲「恭喜佢囉」。
