（獨媒報導）港超聯球隊深水埗昨日宣布由郭嘉諾接任主教練，郭嘉諾今早主持球隊操練，指首要是為球員重建信心。他指因季初表現未如理想，球員出現信心危機，「佢哋都會上網睇球迷留言，或者屋企人覺得佢有無揀啱球隊、有無揀啱職業？我嚟到係想make sure 佢哋要繼續佢哋嘅方向。」他承認球隊的人腳不是太好，但認為可依賴態度爭勝。
作為今季升班馬，深水埗開季4仗不勝，兼失20球，主教練潘文迪日前請辭，由「風車sir」郭嘉諾走馬上任。郭嘉諾指陣中部分經驗不足的球員，在場上「信心一失，連技術都無埋，甚至緊張呢令到體力跌得快，近幾場都出現抽筋。」
表明不會採保守踢法 接手深水埗屬職業生涯最大考驗
深水埗早前遭傑志大炒十球，平了港超聯最大敗仗紀錄。郭嘉諾期望球隊在短期內有進步，「如果你同我講之前輸十球，可能輸九球就進步，呢個唔係進步。喺整體踢法，進攻防守都要兼顧。」他表明不會採取保守的踢法，球員必須放膽進攻，亦要做好防守。
作為區隊，深水埗資源有限，郭嘉諾指球隊人腳不是太好，但認為贏波最重要的因素是態度，喚球員必須相信自己有力在港超聯立足。他表示，今次接手深水埗屬於其職業生涯最大考驗，「要短時間內將一班非常之無經驗球員，變成competitive 唔容易，但係唔係話唔可以。」
郭嘉諾：對同級對手需有競爭力，對強隊要有韌力
不過郭嘉諾表示，執教區隊有更大的責任，希望能吸引更多區內市民入場支持，「一班後生仔好辛苦，唔係好高人工，有啲球員可能要打多一、兩份工，佢哋咁辛苦但落到場表現到精神，呢樣嘢inspire 到好多人。」他補充指，「呢個區好需要幫助，但我哋踢超聯，唔係踢甲組，所以成績都好緊要，攞到第一場勝仗最緊要，對住同級對手要有競爭力，至少要入波，比賽要五五波，對強隊亦都要有韌力。」
一向以熱血見稱的郭嘉諾，曾執教元朗、大埔及天水圍飛馬等港超聯球隊，今年4月到台灣帶領台南FC出戰亞協盃；深水埗陣中有多名其舊部，包括黎格爾、梁星耀等人。在操練開始前，郭嘉諾要求一眾球員列隊，逐一與他們握手打招呼。他其後以英語發言，表明日後同會以英語講解戰術及要求。
他對能夠出任主教練感到開心，但表明對球隊的情況感到憂慮，希望球員能達到港超聯的水平，但就指不肯定球員是否已達到，「你可能覺得你係有呢個實力，但其實可能唔係，所以仲需要努力，至少你要有港超嘅競爭力。」郭嘉諾指自己沒有季前練習（Pre-Season），所以操練的每一環均十分重要，在戰術、體能均有嚴格要求，「每一件事都係為球隊成績著想」。
奧力斯外借加盟 一月再增兵引入外援中堅
烏克蘭籍守門員奧力斯從標準流浪外借加盟深水埗，他亦有出席今早訓練。郭嘉諾指後防現時有信心問題，但絕對與守門員無關，加上現時後場沒有外援，相信奧力斯能在後防受壓時，給予球隊一定信心。
賴沛憶、郭嘉諾、鄧皓禮（左至右）
郭嘉諾同時引入其教練團隊，包括體能教練賴沛憶、運動心理學家鄧皓禮。另外，他透露，明年一月或會有外援加盟，「外援嚟之前，呢班球員可以show 到佢哋嘅能力先，同埋俾多啲經驗佢哋，相信當一月有外援，所有嘢都會慢慢改善到。」
他表示，增兵方向主要為中堅，慨嘆港超聯的中堅、左閘球員數量不足，「傑志、理文都搵外籍球員踢左閘，比較搶手，所以會喺防守上補強先。」
在操練開始前，深水埗總監高俊基勉勵球隊重新出發、重新尋夢，「以往嘅嘢唔洗講，展望將來最重要」，希望球員日後的表現能符合期望。
