端午節假期前夕，闊別12年的英超球隊曼聯重臨香江，與香港隊在大球場舉行表演賽。在香港長大與生活，無論是否球迷，身邊總會有曼聯粉絲。雖然只是表演賽，不少朋友熱切期待這場盛事。做得粉絲，當然會追星，去索取簽名，收集球衣。因此，我有朋友去睇球賽，亦有不喜歡行商場的朋友專誠去銅鑼灣時代廣場睇曼聯球員的球衣展，買紀念品。睇足球比賽要買門票，睇球衣展免費。陪睇球衣展的我，見到現場人山人海，唯有去行City Super ，在試食與shopping之間等朋友。
在香港，喜歡曼聯的朋友們如是開始他們今年的暑假。即使不是曼聯粉絲，英超是香港的集體情意結，睇英超，睇人睇英超是香港生活的一部分。時代廣場的展覽豐富了粉絲們的生活。
在特朗普日日發癲，今日加全世界關稅、聽日要將加沙變成地產項目、後日要將外國學生驅逐出境的時代，能夠去大球場睇曼聯，去時代廣場睇球星球衣是亂世中的小確幸。
從球迷朋友得知，稍後會有香港對印度，又有熱刺對阿仙奴，仲有AC米蘭對利物浦。今年夏天還有Tyson Yoshi演唱會，又可以去睇發咗福的周杰倫的演唱會。
我會去睇多次M+的畢加索展，亦會去香港故宮睇飲食器具展。
世界咁亂 ，要好好放暑假。
（本網歡迎各界投稿，文章內容為作者個人意見，並不代表本網立場。）