對我嚟講，努力抗疫絕對唔係因為驚肺炎，而係怕做鼻咽拭子。如果身邊有人想去檢測，麻煩你同我提醒吓佢，係真係好、痛。
話說我七月中無病徵地發咗兩三個禮拜燒，一直搵唔到病因，做過深喉唾液測試Negative但最後要入院（威爾斯），所以要再做多次鼻咽拭子同咽喉拭子確保唔係中武肺。
過程中都有街坊係醫生好關心我，知我要做鼻咽拭子，佢提我「Not a comfortable procedure. Frequently Nose Bleeding. 」，人生從來無流過鼻血嘅我當時仲好口響話：「I have a strong nose! 」
點知果個鼻咽拭子成為咗成個病最痛苦嘅過程。
如果當你平時伸隻手入去撩鼻屎個深度係一，我諗鼻咽拭子深入嘅程度係三。開頭姑娘擺枝棒入去，你以為已經到頂，點知佢再伸入多一大截。係佢篤入去之前，我真係從來唔知自己鼻腔係有呢一個深度！感覺係幾乎要頂到眼角咁。
鼻腔內有異物嘅感覺，就好似你游水唔小心個鼻吸到水，酸酸痛痛咁，再乘多十倍，因為佢仲要打圈去抹你啲組織。每一下佢刮到我鼻腔組織，我都痛到本能向後縮一下。
我當時每邊鼻孔要抹兩次，抹完頭兩枝我不自覺流嘅眼水濕咗半張廁紙。當姑娘要抹最後一枝嘅時候，愛面子嘅我都忍唔住停咗姑娘，叫佢比少少時間我。
抹完之後個鼻酸痛咗整整一晚，感覺就係仲有好多好多泳池水係你個鼻腔入面出唔到黎。我係咁想「sun」鼻涕，不斷都係有血，「sun」到第朝都仲有血絲出緊黎。
打到呢度都係忍唔住打個冷震。
或者你覺得我係死港孩唔捱得痛，咁我話你聽我係拗柴腰傷家常便飯嘅運動員，我算忍得痛㗎啦。
哦，你去檢測？是但啦。
反正痛完又無用嘅嘢，你做埋我嗰份。