辭職，最不捨得就是個辦事處。
我自細跨區上學，自從長大後都很少在一城內流連，感覺就是返學返屋企，返工返屋企。社會學上空間有分space和place ，在做議員之前第一城公共空間對我來說是流動的space，商場店舖日日轉到我唔記得哂，搵個位坐又愈來愈難。
所以當選後，即使私人舖頭租再貴都好（fyi 我租金連雜費係26,000，其他房協議員7,800都已經好貴），我都要租呢度，津貼4萬蚊租同人工都爆哂都唔緊要。
因為我想佢係一個街坊會逗留吹水嘅place。
雖然疫情令到活動減少，但議辦對我嚟講唔係辦事處咁簡單，係我呢一年幾嚟生活嘅地方。工作之外，食飯打機睇戲不在話下，求助以外，會有街坊入嚟吹水，甚至當正我呢度係順豐智能櫃交收物品，一堆小朋友衝入嚟轟炸我，要考DSE嘅督住佢溫書，有煩惱嘅夜晚一齊飲酒傾計，係literally 0-9x 歲都使用過嘅地方。
Place 係有感情連結，有記憶地方，到而家要交還，實在千萬個捨不得。
但我覺得自己好幸運，幸運嘅係有一班咁樣嘅朋友街坊，願意相信我同我玩；幸運嘅亦都係我有最出色嘅同事，都係願意同我玩（仲要非常無聊）幸運嘅係我知道我好多文宣／物品都去咗好多第一城街坊嘅屋企（612 當日籌款數字達27000，多謝大家）......
幸運嘅係我仲有機會同辦事處好好道別，幸運嘅係我仲可以有能力感受呢種不捨。
幸運嘅係我曾經擁有過呢個機會。
至於掛住大家我就會乖乖地到十字路口開站的（笑）。
愛大家。