鋼草根 扎鐵花
2007 扎鐵工潮文集
已經出版！
http://strikers.wordpress.com/
各位工友及市民:
這本詩集雖未及輯錄所有作品,但仍是珍貴的紀錄,
內容除了工友的作品外,還有工友訪問和詩歌評論,
每本定價六十, (所有收益將會繼續撥捐”支援紮鐵工人基金”)，
如果你是工友,請你向彩鳳免費索取(96240117)
如果你是關心事件的市民, 請你致電我們的發行好拍檔;阿德德書檔的馮先生 (94178344)
再一次多謝所有罷工的扎鐵工友！
************************************
附文集內彩鳳文章:
眼淚在心裡流出扎鐵佬文字
彩鳳罷工第三十三日：9.9
到了罷工第三十三日，一想起要寫扎鐵佬的文字，眼淚就不停打轉，遲遲未能落筆。
記得第一次(罷工第十日)去到天光道罷工現場，是跟噪音合作社的老b去唱歌為工友打氣。那時候，一個工友都不認識，不知道工友的想法是什麼。我認為工友的想法是最重要的，但那時候，眼見有數百工友在現場，我呆滯了，又有點害羞，也不知道如何開口跟工友聊天……突然見到地上有一些紙張，哦！原來是工友自己寫的文字！我是分不清詩詞的人，因為中學讀書時，那只是考試的部份，滿不在意，但在罷工現場，那卻成為我認識工友的開始。
回家立即將那些文字放上網，想盡量廣傳開去，因為當時並未知道自己在這場運動中可擔當什麼角色，而又怕未認識卻又寫文字去再詮釋他們，因此我覺得直接將他們自己的表達散發開去，是最基本可以/應該做的。之後，每天去到現場，就去四處搜索，偷取放在附近的文字。
那時候，也不清楚別人叫它做「打油詩」，但覺得好過癮，因為對我來說，那是簡單易明又鬼馬的；而且他天天寫，好像每一天知道多一點他在想什麼；另外，他不單寫自己，也寫其他工友，也寫每日的行動，從而也知道這個工潮的部份進展；也從那時候開始認識「扎鐵佬」三個字。
幾天後我認識了四眼明，我說：「嘩！有d寫得好鬼馬呀！」他說：「有時候鬼馬d，等d工友開心下嘛，輕鬆下，無咁緊張！」他微笑中帶點詭。過兩天，他又說：「你覺得我咁寫會唔會過火左d？但係過左咁多日，語氣要重d先比到壓力佢……」再過幾天，我才知道原來那些字是他在場拎咪，唱山歌的內容。他說唱山歌就是他年青時用來「溝女」的技倆喲！每一天，他都會將文字唱出來；又有時大家氣氛緊張時，他為跟工友打氣，會即興「亂唱」(意思是隨想隨唱)。大部份中年以上的扎鐵佬都拍手叫好。
罷工第十五日，我聽到有工友唱：「眼淚在心裡流……眼淚在心裡流……我淨係想唱呢句咋！」
到罷工第三十日，有部份扎鐵佬很煩躁，離遠屌尻佢，叫四眼明不要再唱，他便即時停止了。罷工第三十二日，我問他：「你會唔會唔開心，前日有人叫停你？」他說：「唔緊要！工友燥係好正常，都成32日，佢地唔想我唱我就唔唱喇！我都有去成日同一個個工友傾計，盡量同佢地講要繼續撐落去……」之後，我告訴他：「尼泊爾既朋友好鍾意你唱，佢地係咁舉起手指公讚你，琴日佢地突登叫我去叫你唱，不過我話你比人叫停左，唔知會點，跟住佢地就話咁就唔好叫喇……」
罷工差不多第二十二日才認識洗祥。起初，因為有人張貼了他的詩詞到網絡上，影行者的維怡叫我找找他做個訪問，輾轉了幾天才找到他。他令我印象最深刻的是在談判的那天（罷工第二十四日），大家氣氛緊張時，他突然告訴我要寫一些文字給清潔工友，冼祥說：「那天婦女黎支持我地紥鐵佬，我好感動，我知道其中有一d係清潔女工，為左多謝佢地既支持，我寫左首詩送比佢地……唔好成日話扎鐵佬幾勁，人地清潔工友一樣咁重要……為社會……」
罷工三十二日，扎鐵佬又彷彿來跟我說：「真係好難捱，如果唔係，果日談判出黎，都唔會有代表眼濕濕。」
冼祥說自己很低調，不拎咪讀自己的詩詞。談判那天，尼泊爾朋友為在場人打氣唱歌跳舞之後，我朗讀了冼祥的文字，大部份人拍手。我過去向尼泊爾朋友解釋冼祥的文字的意思，他們一群人刻意朝向冼祥的方向，拍爛手掌。那天，工聯會拒絕尼泊爾的代表入談判桌。
過了收集扎鐵佬文字的階段，我認為這本書，必須用力邀請部份扎鐵佬加入：
尼泊爾裔，有香港藉的貝仔（Limbu）說：「我唔係為了自己，是為左我中國人既朋友，我們一起工作，都是朋友嘛。而家少左尼泊爾的朋友出來罷工，但我仍然出黎，我日日朝早六點就來到如心廣場的地盤，同其他人一齊呼籲扎鐵佬罷工。我香港出生，五歲返左尼泊爾，二十幾歲返來做扎鐵，今年36歲，有兩個女，好慘，年紀大返來，唔係好識講廣東話，不過做左扎鐵，都識多左廣東話……」
我見到佢一來就有一個中國人工友同佢招呼，大家請下煙咁。又有個中國人既工友都細細聲同我話：「d尼仔好慘，年青力壯，但人工又比我地低好多……」跟住工友就用廣東話＋手勢同貝仔傾計，貝仔就好努力用廣東話一齊傾，本來我用英文同佢傾計，跟住我都盡量用廣東話一齊傾羅，我同佢講我5歲黎香港，而家30歲，佢羨慕又無奈。
我話大家都好多時忽略了不同種族的朋友的故事和權利，原本打算同貝仔做個訪問，我話佢知，我寫字能力差，所以想拍video……但原來我地兩個都唔習慣用video……
平哥（Thapa）同樣是尼泊爾裔的香港扎鐵佬：「琴日老細打電話比我，叫我返工，我話唔得，攪掂呢度先！要罷工先……！我地d朋友有d唔出黎，我都無辦法迫佢地，有d見到中國人自己都去開工，諗……我地幫佢地出黎都無用喇！今次negotiate到，我地都加唔到既，係得工時方面，如果贏左，我地都有份！……有d要食飯，我地人工仲低d，捱唔得耐，有d因為被歧視唔入得去開會唔開心……」我力邀他寫一些他們的文字，起初他不太願意，後來他拿了一張紙出來給我看，他問：「我怕咁寫，香港人會唔會唔鍾意？」我說那只是直接說出了不應該歧視你們而已。之後，他花了兩天努力（包括找朋友幫忙由尼泊爾文翻譯成英文）寫了一篇「扎鐵佬的遭遇」。
至於27歲既劉啟超，因為年輕的聲音在這工潮中也屬少數，我邀請了他，他立即一晚用心寫了出來，也必須放入這本扎鐵佬的書。扎鐵佬成日都同我講：「而家好少後生入行喇，太辛苦喇，待遇又越來越差，無人肯做。」在錄像的訪問和他自己的文字中，劉啟超又講到要企出黎，部份原因係要撐d中年以上既扎鐵佬：「佢地中年好難轉行，如果係咁減人工，加時間，佢地好慘架。」之前不太認識他，可能因為他是那麼默默地在這樣，從頭到尾。
罷工第三十二日，我又忍不住哭了，被扎鐵佬發現了，扎鐵佬問我什麼事，我說：「已經第三十二日！」扎鐵佬說：「唔好傷心！…其實真係好難捱，我地都係要頂住上咋…」
覺得他們的文字重要，是因為那是人與人溝通的媒介，那是個人在運動中的奮鬥，那是他／們。
************************************
扎鐵工人罷工事件(網頁)：
http://strikers.wordpress.com/