2009年南華打入亞協盃4強賽，最終被科威特競技淘汰，個場賽事除咗吸引一批街外客及舊客入返球場成為港足奴隸之外，大部分球迷打死都記得疑似黑哨一幕，由於亞洲足球多由西亞人話事，屬於西亞嘅科威特足球亦被球迷痛罵至今。
當時本地報章時有披露對手嘅資料，包括科威特超聯依然未職業化。
除外援之外，科威特競技大部分球員平日各有自己嘅職業及身分，有軍人、公務員、學生等，雖然被稱為業餘球員，但面對全職業嘅南華，科威特競技並冇佔下風，老實講雙方拍埋去南華的確差少少，點解業餘球員都可以有咁嘅水平呢？
科威特足球以往主要由政府出錢支持，球員代表科威特出戰只有獎金，平時係冇薪，但大部分球員都係為政府打工，例如軍人，佢地食宿訓練都係由政府埋單，呢批軍人球員非必要唔需要上前線，只需主力踢足球，訓練量絕對比全職嘅香港好，而大學生除讀書外，主力亦係足球。
雖叫業餘，但比職業更職業，咁究竟乜叫職業呢？
上年亞協盃8強賽，科威特競技作客被印尼佩斯普拉大炒6個1，賽後主教練指：我 們 還 未 夠 專 業 。
今日，科威特足球開始走近職業化，多支球隊都擁有職業球員，來投外援亦愈見級數，再唔係一班扮業餘嘅球員。科威特超聯仲有好多需要改善嘅地方，但相比卡塔爾、阿聯酋等中東國家嘅聯賽，科威特足球係落後咗好多，呢支昔日打入世界盃嘅中東勁旅，現在已變成二三線隊，只能與馬來西亞、印尼、塔吉克、香港等球會交手，是否聯賽被長期國有化關係而有所影響？
要做真正職業足球員仲可以選擇外流呢條路，科威特球員可選嘅路線唔多，都係鄰國阿曼、阿聯酋及沙地阿拉伯，能夠西去歐洲發展近年就只有一位幸運兒，佢就係中場Aziz Mashaan(馬沙安)，呢位科威特國家隊中場組織者係科威特球會AI Qadsia(卡迪斯亞)青訓品，曾踢過比利時甲組R.E. Mouscron(皇家莫斯克倫精英)一季，但球隊遇到財政問題被迫返回卡迪斯亞，2012年在度西征加盟加捷克足球甲組聯賽普利布蘭(FK Příbram)，約滿後再次返回卡迪斯亞。
職業向來只係字詞，若果只有外沒有內，咁唔夠業餘打又有乜出奇？