呢隊唔係來自中國地區嘅足球隊，而係來自印尼嘅球隊，叫做Persites Teluk Suak（佩斯笛斯），1967年成立，從未參加過任何印尼官方聯賽，係一支以印尼華人為主嘅業餘球隊，主要活躍於北雅加達，球員多數喺西加里萬丹省嘅山口洋市出生，因各種原因而去到爪哇島上嘅雅加達生活，工餘時間就會參加足球比賽過下癮，由於大多都係由山口洋南下，所以客家話成為隊中溝通語言。
而佩斯笛斯呢隊業餘球隊全朵叫Persatuan Sepak Bola Indonesia Teluk Suak，縮寫為Persites Teluk Suak，多數叫Persatuan，而Teluk Suak就係山口洋市外一個近海地方，華人叫做大灣肚，同香港南丫島嘅大灣肚同名但完全無關，所以亦有人叫呢隊Persites Teluk Suak做大灣肚隊。
喺華人業餘足球界中，大灣肚都算係有名勁旅，曾經喺Dragon Cup同Kalbar Cup呢類由華人搞嘅業餘盃賽多次奪冠，其中2009年參加Kalbar Cup更請來職業球員助陣，有4位都係喺印尼職業賽場搵食嘅外援球員。但近年大灣肚都冇再搵職業球員助陣，今年新球衣胸口更印有新細明體字型''大灣肚''，加強華人色彩。
而以華人為參與者多嘅Kalbar Cup今年喺北雅加達嘅Taman Sari Stadion搞，有超過10支球隊參加，大灣肚亦有參加，現場看台時不時都坐爆，觀眾大多數都係華人，呢類業餘比賽都係為團結當地華人而搞，其實印尼華人有好多對足球運動都有興趣，但多數都係圍內華人之間交流。