今屆Indonesia Soccer Championship A（印尼足球錦標賽A）由印尼「東端勢力'」稱霸，綽號「黑珍珠」嘅巴布亞省球會Persipura Jayapura（佩斯普拉）後上奪冠，呢支印尼足球勁旅以巴布亞省及西巴布亞省嘅原住民巴布亞族球員為主，喺文化、膚色方面同主導印尼政治地位嘅爪哇族有好大分別，不過巴布亞族喺印尼只有約500萬人口，比印尼華族人口少500萬，雖然屬於少數派，但係巴布亞族球員對現今印尼足壇影響力極大，除咗佩斯普拉成為近十年最著名嘅印尼足球勁旅，國家隊都有唔少主力係巴布亞族球員，例如今屆鈴木盃印尼首席射手Boaz Solossa就係喺西巴布亞省嘅索龍市出生，中堅Rudolof Basna都係喺索龍市出生。當然巴布亞族只係一個通稱，仲可以細分多個族群，每個族群都有佢嘅文化及語言。
現時喺印尼足壇三個級別聯賽及青年聯賽活躍嘅巴布亞族球員估計超過500人，喺印尼足壇入面依然係少數，但係比巴布亞族人口多一倍嘅華族，做職業足球員喺印尼足壇三個級別聯賽及青年聯賽加埋唔夠10個，喺今年頂級嘅印尼足球錦標賽A入面勉強只有5位華族球員，有2兩比如效力萬隆嘅Kim Kurniawan及效力婆羅乃FC嘅Gavin Kwan Adsit都係混血兒，只有效力阿雷馬嘅Juan Revi、效力錦石聯嘅Agus Indra及效力佩斯查嘅Sutanto Tan係純正血統嘅華族球員，而Juan Revi及Agus Indra已經本地化，冇中文名、唔識華語、歸信回教、冇過農曆新年習俗，端午、中秋都唔關佢哋事，除外表已同一般爪哇族冇分別，甚至自稱係純種華族嘅Juan Revi外表望落似爪哇族多過似華族，如果唔係佢自爆根本冇人知佢係住喺東爪哇省嘅華族，只有Sutanto Tan係有姓氏及屋企依然重視華族節日及文化，究竟點解人口比印尼華族少一倍嘅巴布亞族會成為現今印尼足壇重要勢力？大家都有對腳，點解對足球嘅投入會差咁遠？
其實喺上世紀90年代之前甚至喺荷屬時期，印尼華族都係印尼足壇不可或缺嘅勢力，唔少現存印尼球會都係華族有分創辦，而荷屬時期嘅代表隊都有唔少係華族球員，去到印尼立國後華族依舊為印尼足壇作出好多貢獻，出錢又出力，但獨立以來第二任總統Suharto（蘇哈托）上場後喺印尼社會舉足輕重嘅華族就成為政治犧牲品，被連番打壓甚至屠殺，蘇哈托管治印尼初期捕殺唔少支持共產黨或本屬共產黨員嘅華族平民，據稱被殘殺嘅華族平民超過50萬，而當中好多根本唔係共產黨，所謂驅共其實係種族大屠殺，當時蘇哈托政府利用原住民（如達雅人）單純思想去挑撥離間，加上本身華族掌握大部分經濟權力引致貧富懸殊，自卑感亦令原住民仇華，所以種種因素加埋就令華族慢慢淡出印尼足壇，因為足球員係公眾人物，身分敏感，怕輸波後成為出氣袋累街坊，到咗90年代踩入印尼職業足壇嘅華族職球員寥寥可數。
去到今日蘇哈托暴政時代結束，華族子民終於被政府承認為印尼一分子，地位都有所提升，開始多返華族子民投入政界、影視界、歌唱界及體育界，雅加達大佬係華族子民，好多新晉影星歌手都係華族子民，印尼武術代表隊幾乎都係華族子民，而印尼藍球職業化後都有唔少華族面孔，去到邊都好似見到華族子民，點解各界都見華族活躍，唯獨投身職業足壇嘅依然只有極少數呢？我嘅分析如下……
1. 足球圈關注度之高與別不同
雖然印尼足球水平低，但係印尼足球依然係國內最多人關注嘅運動，因為足球比賽多碰撞，所以好多華族家庭都拒絕子女投身職業足球圈，即使華族待遇有改善，但當年排華陰影未散，所以好多華族子民仲有一種自我保護意識，盡量唔畀子女投身職業足球圈，以免成為政治鬥爭下之犧牲品。
2. 進入足球圈之機會
雖然加入職業足球圈嘅華族球員極少，但每年青年組別都會見到瀕臨絕種嘅華族球員身影，不過十件有八件轉頭就消失轉行去，可能能力不足被淘汰，不過部分華族家庭可能感覺到歧視存在，比如教練比較照顧「自己友」，自己並非「自己友」好難有機會上位，所以拒絕子女浪費時間。
3. 薪酬前途問題
現時印尼職業足球圈平均薪酬喺東南亞計都算唔錯，若成功上位效力豪門，本地球員月薪可以超過3000美金，地位高超的月薪可以超過10000美金，喺印尼體育界嚟講職業足球員算係搵到錢，但起薪點比較低，所以唔少華族家庭都拒絕子女投身職業足球圈，亦認為種族問題上位機會唔會輪到華族球員，就算能夠站穩陣腳，好多家長都仲係認為足球員並非一份職業，呢種觀念由上世紀至今依然維持，但家長們並非唔講理，因為過去印尼職業足球圈發生過太多財務問題，足球圈環境長年唔穩定都係將足球列入黑名單之因。
相信就係以上因素，即係種族、錢途問題令華族職業足球員瀕臨絕種，不過人口比華族少一倍嘅巴布亞族其實面對緊嘅問題同華族一樣，一樣係因為種族同宗教問題被歧視，但巴布亞族球員可以喺印尼職業足球圈發熱發亮，係因為本身巴布亞族冇華族咁有商業頭腦，並非歧視，本身講搵錢巴布亞族完全唔係華族嗰皮，而有唔少外來爪哇族特權者早就佔據巴布亞省及西巴布亞省嘅主要職位，佢哋往上爬機會本身唔多，所以投身職業足球圈係佢哋其中一條路，加上巴布亞族球員比爪哇族球員優勝在普遍技術功夫較好，形成少數派嘅巴布亞族球員喺印尼職業足壇有一定市場，即使飽受歧視都仲有好多巴布亞族年青球員願意投身足球業，因為冇咩選擇。
巴布亞族球員嘅成功代表只要係好波其實要上位唔難，事實上現時入選大小印尼國家隊嘅球員都係由唔同嘅民族球員組成， 有巽他族、馬來族、巴塔克族、巴達維族、峇里族、巴布亞族、達雅族等，雖然爪哇族球員係印尼職業足壇主要勢力，但並冇喺位置上佔盡優勢，一啲華族子民嘅憂慮可能過多，不過華族喺印尼依然有一定影響力，所以有憂慮係好正常，其實印尼華族並非印尼足球絕緣體，業餘足球界中有唔少以華族球員為主嘅足球隊存在，印尼華族球迷亦非對本地聯賽不理不睬，好似泗水市球隊Persebaya入面都有部分華族支持者，而贊助商都有華族老闆，亦有班主係華族，但究竟日後會唔會有更多華族球員出現於印尼職業足球圈，就要視乎社會發展及政治形勢。