今晚印甲Bali United喺主場順利贏波，距離榜首嘅PSM Makassar只有5分距離，不過我每次留意Bali United嘅主場直播比賽都係留意佢哋主場同看台嘅設施多過比賽踢成點，我覺得Bali United嘅主場Kapten I Wayan Dipta Stadium係印甲入面最靚，咁係因為同Bali United比較特別嘅管理手法有關。
今季Bali United平均入場人數有13,536，印甲入面排第4多，部分比賽可以將Kapten I Wayan Dipta Stadium幾乎填滿，但喺2014年之前係末有Bali United呢隊峇里島足球隊存在，峇里島入面有多支足球隊，包括Persegi Bali、Bali Devata同Persires Bali Devata等等，雖然打住峇里旗號，但由於管理不善，呢啲球隊嘅球迷都唔係好多，但去到2014年未，東加里曼丹省首府三馬林達球隊Persisam Putra Samarinda老闆Harbiansyah Hanafiah決定放棄三馬林達市場，受到華人車呔老闆Yabes Tanuri邀請將會籍轉移去峇里島，改名Bali United（峇里聯），當時印尼超聯並冇峇里足球隊，所以短時間內就聚集咗一批峇里支持者，但最大原因係宣傳手法比較新同包裝精美，參考咗泰國嘅管理，即使以峇里Kabupaten Gianyar（吉安雅縣）做基地，但表明自己係代表成個島，強調無分種族一條心，強烈嘅歸屬感同吸引眼球嘅包裝吸引好多年青人入場，包括願意花錢嘅一班客。
不過咁樣係唔夠，始終要成積先有更多客仔入嚟，於是Bali United大曬金錢購買有實力球員，慢慢客仔因為成積增加，平均入場人數由2016年嘅10,661升到2017年嘅14,348。而咁樣都係唔夠，Bali United向當地政府租用Kapten I Wayan Dipta Stadium十年，期間可以任意修輯球場，為咗打亞洲賽，個球場已經畀佢哋改頭換面，包括增加照明系統，升級更衣室，重新執正體育場看台某些部分例如油返球隊嘅顏色，修理廁所以及升級其他設施，起官方商品店，開Bali United Cafe，最後就係開兒童遊樂區。
而內部管理方面亦比好多傳統印尼球隊好，有良好財政管理，有整齊嘅青訓系統，不過至今仲末有一個屬於自己嘅私人訓練場，要覓得一塊地起訓練場唔難，但似乎唔係有錢就得。