世界盃外圍賽亞洲區打咗2輪，有唔少以往被公認為弱旅嘅國家隊都黎過大爆發，當中包括東帝汶。
相信甚少關注東南亞足球者對東帝汶足球嘅印象，可能離不開東錦外圍賽被柬埔寨及老撾之流大炒，又或者喺世界盃外圍賽畀香港及尼泊爾大炒淘汰，總知就係於亞洲貼底嘅國家足球隊。但我可以好肯定，該支經常被大炒收場東帝汶國家足球隊，已於2011年11月正式宣佈死亡。
要了解東帝汶足球，就先要講講東帝汶足球之過去。2002年5月20日東帝汶脫離印尼獨立成國後立即成立東帝汶足球協會 (Federação Futebol de Timor-Leste) ，2003年宣佈加入亞洲足協並於同年3月首度亮相於2004年亞洲盃外圍賽，當時東帝汶國內情況依舊混亂，親印尼派與主張獨立派繼續互相攻擊，新成立嘅政府末能控制社會，加上獨立前印尼軍隊於東帝汶四處進行破壞，令本身已經疲弱嘅東帝汶經濟嚴重崩潰，市面復原速度緩慢，長期受印尼政府軍攻擊，貧困、飢餓、打劫隨處可見，根本冇錢成立足球聯賽，即使連業餘聯賽都容不下。
受到前葡萄牙殖民政府及吞併者印尼之影響，足球成為東帝汶最受歡迎嘅體育活動，被印尼吞併時期就有唔少東帝汶人做職業足球員，部分更成為印尼國腳，比較出名嘅有同佩迪里差唔多同期出道嘅前鋒 Miro Baldo Bento (班圖)，呢位於東帝汶帝力市出生嘅前鋒曾經喺90年代未為印尼國家隊上陣，東帝汶脫離印尼獨立成國後就自動向東帝汶足球協會報到改為代表東帝汶國家隊(*1)，成為當時東帝汶最著名及唯一職業足球員。
初期東帝汶派隊參加亞洲賽及東錦賽，隊中除班圖、海外歸化球員 Alfredo Esteves(艾菲度)外，大部分只係東帝汶足協招募返黎嘅業餘球員，即使2004年獲國際協助成立 Super Liga Timorense (東帝汶超級足球聯賽)，但受到多種限制，東超聯只能以業餘嘅形式生存，東帝汶國家隊實力亦非常有限。
但到咗2011年，東帝汶足協派出23歲以下國家隊參加東南亞運動會足球項目，今次呢支U23國家隊起用大量於海外踢職業足球嘅血統球員，呢批球員大部分來自巴西、葡萄牙及澳洲，有巴甲後備兵、葡乙預備組球員及澳職棄將，雖然如此，但東帝汶U23依舊被視作魚腩。
2011年11月5日，當時東帝汶足球久未嘗過贏波滋味，但卻先贏汶萊U23，唔夠2日在贏本屬小組黑馬嘅菲律賓U23，令球迷跌破眼鏡，雖然最終於小組出局，但表現已超出外界預期，更肯定血統歸化球員計劃將會成為東帝汶足球嘅止痛藥。
一年後，東帝汶足協派出大約人腳參加東錦外圍賽，2年前柬埔寨至大炒過東帝汶，但今次東帝汶就以5比1大炒返柬埔寨，之後在羸出線大熱老撾，只係最後關頭不敵汶萊出局，但到咗呢個時候，東帝汶足球已向世人發出警示：我唔係垃圾。
今日，東帝汶超級足球聯賽依然以業餘/半職業為主，但青年足球時有佳績，不過欠硬件及配套，唔少好波之人成年後都唔會做球員，國家隊仲係要靠血統歸化球員增強實力，呢批歸化球員有幾個甚為猛料，結果阿聯酋對住呢支東帝汶都羸得十分辛苦。
馬來西亞被東帝汶迫和後，當地球迷都唔多收貨，但未必係馬來西亞足球退步，可能係東帝汶有進步都未定，呢批知名度一般嘅血統歸化球員有返東帝汶發展嘅巴西、葡萄牙球員，亦有球員效力緊科威特、阿聯酋、巴西、泰國、葡萄牙等地聯賽，踢過巴西甲組、葡萄牙超聯嘅球員又有，踢過澳門甲組都有，呢支雜牌軍睇落好化學，但領教過你就知，仲以為係畀香港炒8個果支東帝汶？訓醒味呀？
*1.當年國際足協容許代表過前國家A隊嘅球員在代表另一國家A隊