政府將於呢個星期日（2月27日）開始，將「政府長者及合資格殘疾人士公共交通票價優惠計劃」（二元乘車優惠）延展至60-64歲人士。雖然於疫情肆虐下，公公婆婆都未必敢出街去飲茶見孫仔，但政府於2022-23財政年度仍大幅增加二元乘車優惠嘅經常開支預算，以應付受惠對象數目增加而需對合資格車程作出嘅補貼。
隨著二元乘車優惠計劃擴展合資格年齡層，運輸署預計平均每日受惠長者乘客人次會由2021年125.4萬，倍增至2022年259.2萬。與此同時，《2022-23年度財政預算案》中「 政府長者及合資格殘疾人士公共交通票價優惠計劃」所牽涉嘅經常開支預算，由本財政年度（2021-22年度）嘅14.19億，大增3.25倍至來年（2022-23年度）嘅60.39億。
或者大家會好奇，點解受惠人次翻一番，但開支預算反而會多三倍？主要原因係政府對60-64歲人士所搭每程車嘅補貼金額為「正價車費 - $2」，而非65歲或以上人士嘅「半價車費 - $2」。60歲同65歲人士同樣都係畀兩蚊搭車，但背後由公帑補貼嘅金額可以差天共地。
值得一提，城巴新巴母公司匯達交通於2月23日有關二元乘車優惠安排嘅新聞稿，特別提到城巴過去一直為60-64歲乘客提供每程半價（平日）及二元（星期日及公眾假期）長者票價優惠，將會於2月27日中止並轉移至「二元優惠計劃」。上述安排對乘客而言並無實際影響；但技術上來講則意味呢項歷史悠久嘅長者票價優惠，將改由政府承擔相關補貼。
延伸閱讀：
原來要去到九十年代 長者搭車先有得平（2021年1月24日）
老友記申請樂悠咭後 想退返個人卡？點都要硬食十蚊退卡費（2021年12月18日）