體育

香港青年足球員路難行

廣告
香港青年足球員路難行

廣告

原定遠赴西貢睇丁組大戰或去城門谷隊住青島睇甲組,因為訓過龍嘅原因而放棄念頭,但又唔想留喺屋企做鍵盤戰士咁單吊,於是乎即興揀咗喺身住本區(北區)舉行嘅青年聯賽(U15)黎參觀參觀,今季甲組、乙組、丙組、丁組都略略參觀過,就係青年聯賽同女足末郁過,還掂半個鐘可以出到去上水,就順便去參觀吓啦。

頭場U15青年聯賽由屯門 vs 標準流浪,一開波標準流浪後防末有集中精神即失一球,失波嘅標準流浪慢慢開始憑較佳嘅技術拎到主動權,但浪費咗好多機會,上半場屯門1-0標準流浪。下半場標準流浪後防遲遲末能解圍出事失多一球,屯門領先2-0標準流浪。時間一分一秒咁過去,正當支持標準流浪嘅家屬們都認定大勢已去時,球隊喺尾段時間追近到2-1,入咗呢一球後流浪嘅球員似乎醒一醒,有一球單刀下射中楣,最後屯門2-1標準流浪。

我入場睇青年聯賽除咗參觀參觀之外,真係純支持香港足球,因為香港足球唔只甲組,仲有好多低組別球員努力緊,包括青年聯賽嘅球員。不過好可惜嘅係,青年聯賽嘅球員資料喺網上非常缺乏,今場比賽標準流浪3號外籍小朋友好搶眼,雖然佢身材唔高大但係技術幾好,派咗唔少波,但HKFA.COM都係冇任何青年聯賽球員資料只有比分顯示,我想知道邊個打邊個,得一個方法,就係厚住臉皮喺現場問人。或者HKFA.COM及球員家屬們覺得冇公開球員名單嘅需要,又或者預咗青年聯賽冇咩人關心。

呢班球員將來有可能係香港足球未來力量,但香港球壇亦要面對所謂現實,依家甲組有啲球會投放喺足運嘅心機及金錢唔少,又多咗少少人關注香港足球,俾到球迷及青年球員少少希望,不過冇人保證『冰河期』唔會在黎,經歷過『冰河期』嘅球迷及球員都清楚喺個段時間場面係幾咁慘不忍睹,李偉文寧願唔踢港隊去揸小巴兼職、梁智駒著西裝趕去球場,唔少球員月薪唔夠5千要兼職,有啲甚至更少....

之前網上有個TOPIC係話如果美斯喺香港出生命運會點,好多人都認為如果美斯喺香港出生可能只係一名普通打工仔,在睇返香港,有咁多青年人鐘意踢波,有啲好有潛力,不過可能揾食嘅問題,好多潛力青年球員都放棄足球夢轉行,喺香港做職業足球員近幾十年來都係好唔穩陣,只可以說一句,有心行呢條路嘅青年球員加油吧!

廣告