2014年亞足聯挑戰盃抽籤完成，東道主馬爾代夫與巴勒斯坦、吉爾吉斯及緬甸同編入A組，B組有土庫曼、 阿富汗、老撾及菲律賓，比賽打單循環制，小組首兩名出線4強，冠軍可晉身2015亞洲盃決賽週。
A組被公認為實力最好嘅係巴勒斯坦，呢支國家隊從未晉身過亞洲杯決賽週，喺西亞計實力唔算強，但偶有佳績，面對敘利亞、約旦、阿曼等對手都互有輸贏。巴勒斯坦有大量外流球員，但近年因為種種問題令選人方面有困難，即使如此，起用本土球員嘅巴勒斯坦依然可以輕鬆地喺亞足聯挑戰盃預賽出線，所以今次冇咗北韓，佢地同土庫曼就變成冠軍大熱。
東道主馬爾代夫嘅主場力量一向強大，今日呢支馬爾代夫國家隊應該係史上最強，過往一直係俾列強大炒嘅魚腩，如今有史以來最接近亞洲杯決賽週兼做東當然會把握機會，南亞盃拎過，係時候向亞洲盃出發。
而中亞嘅吉爾吉斯為咗挑戰盃，上年打咗唔少友賽，破晒歷年紀錄，唔在係潛水隊，面對白俄羅斯、愛沙尼亞踢得有板有眼，如果外流嘅球員到齊，絕對有力爭出線。
緬甸嘅實力喺東南亞中間位置，近年冇咩大作，不過有時面對級數比自己高嘅國家隊比如泰國都可以突然打到人地嘔血，力爭出線唔係冇機會，呢組除巴勒斯坦外，實力好接近。
B組被公認為實力最好係土庫曼，呢支中亞國家隊喺04年打入過亞洲盃決賽週，表現非常出色，但國家問題拖累埋足球，否則實力可以進一步提升。現時有超過十名球員選擇外流，但呢批外流兵甚少齊腳，但即使如此，10及12年嘅挑戰盃土庫曼都係以本土球員為主，呢支國家隊可以用深不可測去形容。
阿富汗則係上年南亞冠軍，以外流兵為主，雖然實力可能與土庫曼有些少距離，但絕對有力爭取出線，今日嘅阿富汗國家隊在唔係當日俾土庫曼大炒7蛋嘅阿富汗，而菲律賓近年靠血統球員提升實力，即使陣中有效力德甲嘅球員，但最近嘅國際賽顯現出菲律賓飄忽不定嘅狀態，能否出線得要問問自己。
至於老撾應係最弱一隊，但老撾嘅反擊速度非常高且有效，過往泰國、印尼之流曾險些死在老撾之下，老撾要力爭出線比較難，但喺此組亦可能係一個頑強嘅滋事份子。
比賽喺5月打，有興趣嘅可以留意吓。