圖：效力烏兹別克賓約哥嘅前烏克蘭國腳Serhiy Symonenko
烏克蘭衝突加劇，神祕女求援影片網路瘋傳，成個facebook都係呢段片，年半前舉行歐國盃嘅地方如今變成咁，真係今日唔知聽日事。
談到烏克蘭，順便談吓烏克蘭嘅足球，如無記錯，港甲未有烏克蘭球員出現過，烏克蘭球員亦好少喺東南亞、東亞出現。不過，中亞就可以揾到好多烏克蘭球員，可能大家都曾經係同一個國家，識俄語嘅人唔少有關，烏兹別克及哈薩克嘅頂級聯賽現時就有超過5名烏克蘭球員身影，甚至喺吉爾吉斯及塔吉克亦可以揾到烏克蘭球員，特別係近年，多咗好多烏克蘭球員去中亞落班。
去得中亞嘅，都係啲前國腳、2-3線甚至3-4球員，事關如果只係打烏克蘭嘅次級聯賽或者頂級聯賽嘅小球會，人工已經可以同頂級嘅中游球會差好遠，由於佢地質素有限，於是乎為咗揾米路，呢批級數較次嘅烏克蘭球員就去到水準冇咁好嘅中亞揾機會，而有返啲級數嘅，可能會加盟烏兹別克及哈薩克嘅頂級聯賽球會，薪金可能比起佢地喺家時要好，至於連烏兹別克及哈薩克聯賽水平都未達標嘅，就只有喺吉爾吉斯及塔吉克揾機會。
以往俄乙未取消註冊外援時，都會見到唔少2-3線烏克蘭球員，但外援註冊取消之後，呢批球員又少咗一個出路，令到呢批球員要去到塔吉克甚至印尼落班。其實呢批實力較次嘅烏克蘭海外兵都幾慘，因為國家從來遺忘佢地，只因佢地級數唔夠，國家唔需要佢地，甚至連烏克蘭球迷都冇幾多知道原來連吉爾吉斯呢啲半職業聯賽都有烏克蘭球員存在，一線嘅球員得到世人嘅關注，一舉一動都被留意，而呢批較次嘅球員可能喺異國受害或被長期拖險薪金，但從來冇咩人理佢地，往往要去到冇彎轉嘅時候，先會吸引到少少人嘅目光，但被發覺時已成悲劇。