尋日係丁組聯賽最後一週比賽（之前離島對福建腰斬會於未來重賽），一早已經宣佈出局嘅瑞聯以0比4不敵離島，以0勝0和20負入7球失118球0分完成今季比賽，好可能係繼1970-1971年乙組球季港會0分降班後又一支『0分球隊』。
呢場完全無關痛癢嘅丁組比賽一共吸引咗20多名球迷前來（只計肉眼目測所見之人），亦可能係近年丁組聯賽中最熱鬧嘅其中一場賽事，唔計球員家人朋友，相信前往蒲崗村嘅球迷都係想睇瑞聯會唔會拎到最後1分／3分，都係想睇瑞聯會唔會成為『0分球隊』，段估冇人會專登入場只係為咗睇吓離島嘅印度裔中場兼『重炮手』Brar Manjeet Singh（阿星）掛？
其實要吸引一個唔係睇開業餘聯賽嘅球迷入場係非常困難嘅，首先其他級別嘅業餘聯賽之重要性唔大，其次就係因為『業餘』，水平有限，即使免費入場亦難以吸引球迷專登去捧場，其他級別嘅業餘聯賽要吸引球迷入場，比甲組吸引球迷入場困難一億倍，香港只係一個彈丸之地，能夠容納4個級別嘅足球聯賽已經唔錯，所以唔理點都好，花生心態又好無所事事去睇又好乜都好，肯走入場嘅已經好唔錯，見到場內有超過20名球迷注視緊瑞聯 vs 離島嘅賽事，我真係有少少感動。
簡單啲講吓場波，比賽初段離島已經憑一個12碼先開紀錄，之後離島一直壓住瑞聯黎攻，打嘅多數都係簡單地將個波吊去禁區外兩路進攻，但離島當然唔會咁獨孤一味，瑞聯後防實力有限，離島本身就有唔少良機，但唔係自己錯失，就係比瑞聯嘅守將瓦解。瑞聯以防守反擊為主，但由於整體實力一般，所以離島後防上半場冇咩受到威脅，離島憑一個12碼及瑞聯嘅一個烏龍波，以2球領先入更衣室休息。完半場前發生一件小插曲，瑞聯長傳攻勢，接應嘅『快馬』梁詒璋高速試圖追趕皮球，但被離島嘅高大肥佬守門員（唔記得咩名）快步出迎沒收，梁詒璋可能與對方有些少碰撞倒地慘叫，離島守門員將個波掟比隊友繼續進攻，球証亦無表示什麼，此時戴球中嘅離島邊後衛球員不停回頭，可能疑惑緊應否踢出去，事關梁詒璋仍然倒地不起狀甚痛苦，但離島嘅高大肥佬守門卻大叫：
「唔洗理佢，我冇掂過佢。」（我坐個面所以聽到晒）
梁詒璋聽到呢句之後立刻向住離島守門員痛罵「我喇喇喇^&*%$#@」，二人互不相壤互相問候，幸好兩隊球員立刻上前分隔二人，最後球証送咗黃牌俾呢兩位球員。我記得喺首飾 vs 瑞聯嘅比賽中，梁詒璋亦同對家球員嘈過，不過足球場上係咁，有時有啲球員係比較難控制自己，嘈幾句好普遍，最緊要唔好郁手，呢個世界好細嘅。
下半場離島繼續控制大局，好快瑞聯又失多球，之後離島印度裔中場Brar Manjeet Singh（阿星）主射罰球，守門員撲到但甩手，混亂中離島球員補中但球証話越位，尾段時間離島嘅杜健誠（唔太肯定）喺禁區內擺脫幾名守衛窄角度射入，最終瑞聯以0比4不敵離島，正式為今季丁組聯賽生涯劃上句號。
瑞聯出局後，究竟幾時會重返聯賽？冇人知。今季瑞聯表現係強差人意，喺丁組嘅實力好明顯同其他球隊有距離，但最少佢地依然有去盡力踢好每場比賽，最少仲會尊重返場比賽，算係咁。