亞洲挑戰盃B組今日又有『雙料娛樂』上演喇，分別係老撾對菲律賓（19：00）及阿富汗對土庫曼（00：00）。阿富汗對土庫曼係焦點所在，不過就唔講住，而亞洲級無敵新興勁旅（自稱力迫日韓唔係老屈）菲律賓咁『犀利』一定贏硬拎冠軍入亞洲盃在大炒日本都似所以就更加唔洗講，不如講講啲WFC啲嘅，老撾國家隊啦！
東南亞錦標賽我由98年睇到今日，有8屆之多，對老撾足球都有少少感受要分享下。老撾足球呢幾10年來喺東南亞中都係處於一個弱勢位置，不過老撾足球算係東南亞足球弱勢系列中實力比較好嘅一隊（近年已經冇呢回事）。雖然老撾係亞洲足球『弱者』，但老撾嘅球員唔係垃圾，部分球員個人技術係幾好，球員身上帶有所謂典型東南亞足球員嘅特質，普遍身材唔高，但速度快及技術好，不過由於國家隊內大部分唔係全職球員，缺少專業訓練下，國家隊成積有限，而且一支以打快速防反為主嘅國家隊，卻長期面對住體能一般嘅毛病，『下半場老撾嘅體能係一個考驗』，呢個已經係老撾足球公認問題。近年嘅老撾國家隊打咗唔少『半場好波』，佢地絕對係有能力組織到去對方禁區射門，而且打得有板有眼，但好奇怪嘅係下半場老撾就會判若兩隊，除咗體能下降受影響，球員嘅心理都係一個大問題。
老撾『半場好波』紀錄
中國 7-2 老撾，半場中國 1-2 老撾
馬來西亞 4-1老撾，半場馬來西亞 1-1老撾
新加坡 4-3 老撾，半場新加坡 1-2 老撾
馬爾代夫 7-1 老撾，半場馬爾代夫 1-0 老撾，下半場老撾扳平在輸
老撾 1-5 土庫曼，半場老撾 1-1 土庫曼
今次老撾嘅挑戰盃大軍名單中，有5個球員喺泰國踢職業聯賽，其他球員都係效力本土半職業球會，隊內有職業球員，有學生及警察。老撾有自己嘅足球聯賽，但呢個聯賽係有職業球會、半職業球會及業餘球會，並非一個全職業聯賽，儘管近年有唔少球會請職業外援，令聯賽更加激烈，但水平有限，所以去泰國踢職業聯賽就成為老撾職業球員嘅『路』，今次老撾嘅挑戰盃大軍名單中，有4個球員喺泰國乙組揾米路，包括隊長蘇薩瓦（Ketsada souksavanh）、S.沙山拿（Sopha Saysana）、L.沙山拿（Lembo Saysana）及前鋒沙亞活迪（Khampheng Sayavutthi），另外一名叫萬青康（Soukaphone Vongchiengkham）嘅中場球員就踢緊泰國甲組。由於老撾與泰國接近，有啲生活文化亦好接近，所以老撾球員好易適應泰國嘅環境，在加上老撾球員人工便宜，於是乎一啲經濟力較次嘅泰國甲乙組球會就向老撾球員招手，令老撾球員多咗機會出外。
老撾國家隊喺國際賽中都爆過好幾次冷，而且近年贏過菲律賓，雖然菲律賓今場有2個主力可以出場，但唔係真係自稱力迫日韓就真係亞洲新興勁旅，所以佢地對住老撾都唔係100%贏硬。
ps.今次老撾嘅挑戰盃大軍名單中所見25歲以上球員不足5人，體能下降真係一個問題？