太平洋運動會剛剛結束，足球項目中密克羅尼西亞聯U23邦以0比30、0比38及0比46不敵大溪地U23、斐濟U23及瓦努阿圖U23成為國際足壇另類新聞，世人只將目光放於臨時組成嘅密克羅尼西亞聯邦U23身上，完全忽視東道主巴布亞新畿內亞U23，今次呢班小子獲得銅牌。
或者太平洋運動會冇乜重要性，咁以下呢單一定夠晒重要喇，由於南非退出，大洋洲國家巴布亞新畿內亞承辦咗2016年U20女子世界盃，係該國足運首度舉辦大型足球賽事。
提到巴布亞，普遍人可能只會諗起巴布亞企鵝、食人族、落後，好難與足球扯上關係，更有趣係有球迷反而會諗起屬印尼管治嘅巴布亞省查雅普拉市球隊佩斯普拉。
印尼管治嘅巴布亞省及西巴布亞原住民與巴布亞新畿內亞原住民流住相同嘅血，但受國情影響，雙方重視嘅體育運動都唔同，巴布亞省及西巴布亞流行足球，巴布亞新畿內亞流行欖球，巴布亞省及西巴布亞內有多支職業足球隊，巴布亞力量成為印尼足運不可或缺之一員，印尼國家足球隊箭頭沙路沙、艾保爾都係巴布亞人，而隔壁之巴布亞新畿內亞卻難尋一位有標諗性代表嘅球員。
巴布亞新畿內亞足運過往雖較低調，但都曾令世人短暫轉移視線，當地半職業球隊赫卡里聯喺09-10年就曾於大洋洲聯賽冠軍盃決賽擊敗新西蘭韋達基利聯獲世冠盃門券，即使最後被阿聯酋嘅阿爾華達淘汰，但表現依然受到好評。
與其他大洋洲(新西蘭例外)國家唔同，即使足球並非巴布亞新畿內亞第一運動，但2006年卻成立咗一個半職業化全國足球聯賽，吸引所羅門、瓦努阿圖、斐濟等地球員前往當地做職業球員，但由於發展力不足，巴布亞新畿內亞於國際賽成積只係一般，於大洋洲實力並非太差，但屈居於所羅門、大溪地、新喀里多尼亞後。
由於大洋洲足協會員間甚少互相友賽交流，巴布亞新畿內亞足協近年轉移與鄰近之東南亞各國作足球交流，上年就曾派U23去印尼參加盃賽，結果被印尼U23大炒6球，上年國家A隊又與菲律賓及新加坡友賽，結果又係輸晒。
即使實力不足夠與東南亞列強匹敲，但與東南亞各國作足球交流計劃會繼續進行落去，因為除咗東南亞，冇成員國Show會佢地。即使被列在2018年世界盃大洋洲區外圍賽第二輪內(第二輪又即係大洋洲國家盃)，但面對新西蘭、所羅門、大溪地等對手，巴布亞新畿內亞確實好難突圍，如依靠今日一班本土半職業球員，實力非常有限，有見及此，巴布亞新畿內亞足協都有向居於海外嘅合資格球員埋手去增強實力，呢批合資格代表巴布亞新畿內亞嘅球員大部分來自澳洲及新西蘭，部分海外球員好早就移民到當地，並成為澳洲及新西蘭人，亦有父母有巴布亞新畿內亞血統，代表過巴布亞新畿內上陣一次嘅澳洲球員George Slefendorfas(斯里杜爾法斯)就係一個例子。
呢位32歲嘅前鋒身上擁有立陶宛及巴布亞新畿內亞血統，8歲從巴布亞新畿內亞移居到澳洲，長大做咗職業足球員，移居瑞典後即加盟瑞典甲組足球聯賽(第3級)球隊達庫德(Dalkurd FF)，但一個賽季後又返回澳洲，放澳洲、新西蘭兩地打滾。
但論知名度最高應該係左後衛麥當勞(Brad McDonald)，呢位澳巴混血職業生涯效力過中岸水手，並入選過澳洲U23集訓大軍。
只可惜，呢批海外援兵實力非常有限。