圖片授權：自己部電腦 print screen
連日黎已經有很多報導、評論文章、懶人包影片等討論有關事件，在此不再重覆。不過作為 IT 界嘅一個「死生意佬」，我都想用一個「死生意佬」嘅角度去分析下網絡廿三條對 IT 業界究竟係著數定蝕底。舉幾個簡單例子：
1. Google
Google係全球最大的網絡搜尋器，如果你本身有整網頁，甚至簡單到上 facebook 出過 post，都好有可能已經俾 Google 紀錄低去佢個搜尋器入面。Google 點解會咁好人幫會你儲低哂所有野，仲俾你隨時隨地搵返？原因好簡單，因為咁樣會吸引到所有人都用佢，愈多人用賣廣告就愈賺錢。
既然係咁，即係佢用緊我地上載嘅內容做商業用途啦，商業用途政府無豁免咖。當然，Google咁大間可能一開始已經有隱藏條款寫咗話「只要你係網主，就自動授權我攞你嘢，除非你自己 block Google……」咁又有幾多人識 block 或者肯 block Google呢？
就算咁又點，梁振英一樣可以用刑事告 Google，因為版權法凌駕合約條款咖。不過，我相信梁振英就唔會夠膽拉 Larry Page 去坐監啦。
2. YouTube
YouTube 其實都差唔多，都係靠其他人上載影片，然後吸引更多人睇，再賣廣告同上載人分享收入，所以又係商業用途啦。
講真，整片會更加容易犯法，只要有一秒嘅內容有問題，都有機會俾人民事索償。預期會有好多人甚至大公司都因為咁而唔肯冒險去整片放上 YouTube，YouTube喺香港嘅生意規模無可避免會大量委縮，甚至唔再玩香港市場。
3. Openrice
香港人最鍾意嘅食評網，差唔多香港每間餐廳嘅資料都有哂。但係，究竟有幾多間餐廳有授權 Openrice 去刊登佢地嘅資料？最大問題係我又可唔可以影張嘢食相、餐廳相，去寫下食評，放上facebook賺like呢？
基於以上兩大疑問，個人認為 Openrice 受嘅打擊都唔細。如果班餐廳大集團有心搞佢，佢可能都要被迫將餐廳資料同食評下架。
4. 迪士尼
迪士尼唔算得上IT公司，不過我就覺得佢反而得益最大。
如果我係迪士尼老細，網絡廿三條通過後，我就會即刻攞住個大聲公係迪士尼樂園講：「各位香港人，唔好意思，因為網絡廿三條已經通過咗，所以你用自己部相機同卡通人物影完相再放上網係犯法咖。不過唔緊要，我地員工係好樂意用佢地部 iPhone 6S幫你影相同俾你 upload facebook，只要每張100蚊，你就可以攞返張相同抄低我地員工部 iPhone個serial no.，咁就可以 upload 咖啦。至於內地嘅朋友，唔使擔心，只要你用緊嘅係大陸版微信，就唔會有限制，可以隨時自己影完就上載去朋友圈。」
政府口口聲聲話要發展創新科技，但做嘅嘢就永遠背道而馳。好似之前 Uber 事件，其實都係為咗保障既得利益者嘅利益 (的士業界)，去打壓創意同創新。今次亦都好類似，為咗保障版權持有人嘅利益，不惜犧牲大眾享受創意同創新嘅權利。如果網絡廿三條真係通過，預期好多新興的經濟模式都會被破壞，因為政府可以隨時隨地話某個網上平台係侵犯版權嘅幫兇 (以上嘅例子只係其中一少部分)。無論大公司細公司，新公司舊公司，都會因為咁而減少創新，固步自封，到頭來只係會損害整個經濟發展。
所以建制派，真係諗下不如反對啦，今次可能連你嘅生意、你嘅投資都有機會有損失咖。