立即捐款

Momay

我係熱愛足球嘅油漆佬。 網誌

體育

由港甲踢到去蘇超

由港甲踢到去蘇超
廣告

廣告

早排講過由印尼聯賽踢到去歐洲頂級聯賽嘅個案,今次就講由香港踢到去歐洲頂級聯賽嘅個案,呢類個案以往都有,但近年就比較少見。

一直都有個畸怪說法,就係去得香港踢波嘅外援都會被標籤及定位,佢哋離港後都難以登上世界級水平嘅足球聯賽發展,俗語有云「掂就唔會嚟香港啦」,呢句好似好有道理,但巴西中堅Lucas Tagliapietra就推翻呢個說法,即係前飛馬球員盧卡斯。

26歲嘅盧卡斯身高194cm,喺巴西西北部城市阿萊格雷特出生,呢度靠近阿根廷及烏拉圭,12歲開始接受專業足球訓練,佢接受蘇格蘭媒體訪問話「In Brazil,when you want to play football,you have to leave home」,2010年佢就去到南聖克魯斯效力巴西球隊Santa Cruz RS(聖塔庫魯RS),由於上陣機會極少,佢選擇出外,第一站就係香港。

有蘇格蘭媒體形容盧卡斯去香港效力飛馬嘅一個賽季係佢嘅黑暗時期,但盧卡斯好似冇咁嘅想法,雖然佢喺港甲表現唔太突出,但令佢最大得益係知道英語嘅重要性,喺巴西求學時盧卡斯有機會接受習英語教學,但從來冇認真學習過,去到香港迫使佢要認真對待呢個問題,於是佢開始自己學習英語並隨身帶住一本小筆記本,用嚟記錄重要嘅單詞及句子。

2012年佢離開香港去實踐童年夢想,就係去歐洲踢波。但佢首站係去摩爾多瓦,一個足球水平喺歐洲嚟講唔高嘅內陸國家,效力摩爾多瓦國家足球聯賽球隊FC Dacia Chisinau(達斯亞),踢咗一個賽季後轉投另一支摩爾多瓦勁旅FC Milsami(米爾沙米),雖然上陣機會唔算太多,但幸運地獲得一個超級機會,就係加盟蘇格蘭超級足球聯賽嘅Hamilton Academical FC(咸美頓)。

2015年盧卡斯正式加盟咸美頓,最初冇乜上陣機會,但去到15-16賽季就成為球隊正選變成咸美頓嘅重心球員,現時為球隊上陣33次射入3球波,今晚都有比賽踢,咸美頓正忙於護級。對於幾年間就由港甲踢到去蘇超,大部分球迷得知後都好驚訝,因為盧卡斯喺港甲時期並非大超班,但唔好忽略佢去到摩爾多瓦嘅兩個賽季下咗唔少功夫,相信有唔少進步,而多得去香港嘅體驗,現時佢英語講得十分好。

廣告