最近睇到一篇新聞話日本國腳本田圭佑睇中柬埔寨足球市場計劃去柬埔寨開足球學校，呢位國腳上年曾經喺世界盃外圍賽亞洲區第二圈代表日本主場對住柬埔寨，柬埔寨隊嘅嚴密防守令佢非常難忘，最重要係佢睇到柬埔寨隊有好多球迷。
仲記得上年柬埔寨男足擊敗澳門打入世界盃外圍賽亞洲區第二圈舉國歡騰，雖然對手只係長年積弱嘅澳門，但能夠打入次圈同日本、敘利亞、阿富汗等交手，對柬埔寨男足嚟講真係冇幾多次，而冇耐一場柬埔寨聯賽選手隊對老撾聯賽選手隊嘅友賽喺首都金邊Olympic Stadium舉行都受到打入世界盃外圍賽嘅影響有六萬球迷瘋湧入場，呢種火爆場景喺柬埔寨足球界已經有一段時間冇見過。
由於打入世界盃外圍賽第二圈，連柬埔寨華文媒體都經常報導柬埔寨男足嘅消息，有華媒更將柬埔寨男足描述為與泰國實力不相伯仲嘅國家足球隊，當然最後事實擺喺眼前，柬埔寨男足喺第二圈賽事輸清光，盡顯自己與亞洲其他對手嘅級數差距，乜嘢與泰國實力不相伯仲只係幻想，實情同阿富汗水平都有段差距。
但柬埔寨四場主場賽事中一共吸引近二十萬人入場，對於柬埔寨足球嚟講呢個數目係一支強心針，比起2008年東錦賽外圍賽及2014年世界盃外圍賽亞洲區第一圈對老撾嘅賽事火爆得多，雖然六戰六敗出局被外界形容為超級魚腩，但柬埔寨隊面對擁有多位世界級球員嘅日本隊表現都唔係太差，球員搏埋條命為柬埔寨保住大門令球迷明白柬埔寨隊嘅存在意義係乜同點解柬埔寨隊咁屎波都要繼續支持佢哋。
有台灣球迷驚嘆柬埔寨對台灣嘅亞洲盃外圍賽賽事居然有六萬球迷瘋湧入場，其實都冇乜好驚嘆，只係柬埔寨球迷醒覺而已，熱誠並非一個世界盃外圍賽就會減退，台灣一樣得但時機未到咁解。
國家隊多返球迷入場睇，但本地職業聯賽(Cambodian League)又如何？其實都係同以往一樣，唔係太多球迷入場。喺日本嘅扶助下，C League發展得都算幾順利，有唔少擁有J League經驗嘅日援都去到當地搵食，效力National Defense Ministry FC(國防)嘅朝鮮國腳崔敏鎬更係現時聯賽射手，比起最初C League成立時水平好得多，不過C League球隊主要集中喺金邊比賽，仲未有能力搞全主客制下吸引力有限，同埋國家隊同球會始終係兩回事，睇怕要同國家隊一樣座無虛席都要一段時間喇。