國際

英國公投脫歐 關澳門人咩事?

廣告
英國公投脫歐 關澳門人咩事?

廣告

英國下星期四(6月23日)將就脫離歐洲聯盟舉行公投,最新民調顯示「脫歐」支持率領先。英國嘅事好似好遠咁,但對於有15萬持葡國護照嘅澳門人嚟講,呢個可以係一個警號。

持葡國國護照嘅澳門人,取得葡籍得到嘅最大好處,其實唔係來自葡國,而係歐盟條約。歐洲公民喺各成員國可行使「自由移動」(Freedom of Movement)權,去各歐盟成員國搵工、做嘢、生活、讀書等,而呢個「移動自由」係一項「權利」。

香港人去英國讀書同工作,絕大部份人都要經過向英國政府申請簽證手續先去得。但葡籍澳門人去英國讀書、工作或居住,現時係一項「權利」,只要有學校收你或者有人聘請你,就可返學返工。

有英國民眾想脫離歐盟,其中一個原因就係呢個「自由移動」權所衍生嘅「問題」,認為現時英國因無法控制遷入人口而喪失國家主權,影響本地人就業,以及無法拒絕其他歐盟大陸公民因入境所影響嘅安全等等。

若果英國確定脫歐,葡籍澳門人可享有嘅「自由移動權」勢必將會縮減。而最壞可能出現嘅情況係,英國完全將澳門人視為「歐洲以外嘅人」,以後去讀書、工作、居住都要申請簽證。當然,一旦脫歐後英國同歐盟會維持咩關係未有定案,亦可能好似瑞士咁同歐盟各國簽多邊條約,令「歐洲『大陸人』」仍較容易遷移進出英國,但最後咩發展仍係未知之數。

原載 2016年6月17日《愛瞞》

廣告