立即捐款

Momay

我係熱愛足球嘅油漆佬。 網誌

體育

日本球員與蒙古KFC蒙式炸雞扒飯

日本球員與蒙古KFC蒙式炸雞扒飯
廣告

廣告

蒙古足協發放上週蒙古國家足球隊與蒙古聯賽選手隊友賽後嘅訪問,其中一位來自日本嘅蒙古聯賽選手隊球員以簡單蒙古語回應記者提問,唔識聽都聽得出講得好唔順暢,但蒙古球迷對此反而幾受落,呢位日兵願意嘗試學習蒙古語去適應蒙古嘅生活所以得到球迷尊敬,佢就係效力蒙超球隊Selenge Press FC(色楞格出版社FC)嘅後衛佐佐木瑞穗。

佐佐木瑞穗身高180CM,今年三十,司職中堅,佢自己提供嘅球員生涯資料指效力過讚岐卡馬達馬尼、町田澤維亞等日本職業足球隊,但當時球隊都喺JFL,佢亦唔係以全職身分效力,之後亦加盟過スペリオ城北、FC Central Chūgoku等地方業餘聯賽球隊,唔係佢唔想踢全職,而係佢喺日本唔夠班踢。直到上年佢遇到一個踢職業足球嘅機會,於是佢鼓起勇氣放棄正職前往遙遠嘅蒙古試腳,結果成功與FC烏蘭巴托簽約,初嘗做職業足球員嘅滋味。

相信熟悉日本足球嘅球迷都未必聽過佐佐木瑞穗嘅大名,事關太多日本足球員浪跡天涯去到唔同嘅地方踢波,有時有啲球員去到某些非足球強國落班都可能因為地方太冷門及本身球員冇乜知名度而被無視,幸好今日互聯網發展迅速,社交網興起令呢班外流日援唔會太過孤單。好似今年佐佐木瑞穗轉投色楞格出版社FC,就經常喺社交網分享賽事及蒙古生活點滴,例如輸贏感受、與對手外援門將傾計、見到蒙古商店賣自己個名件波衫非常滾動、談及日本冇嘅蒙古KFC蒙式炸雞扒飯,又會發放與同鄉戰友菱田拓、南陽介、山本真也等人聚餐嘅相片,絕對比現時去東帝汶踢波搵食嘅印尼外援幸福,最少烏蘭巴托網絡服務比較好。

廣告