今年嘅印尼足球錦標賽其實等同昔日嘅聯賽，只係好似港超聯咁換咗個名，分兩個級別作賽，2014年由PSSI(印尼足協)成立嘅Liga Nusantara(群島聯賽)本來屬於第三級足球聯賽，不過足協喺2015年被凍結運作，所以群島聯賽都跟住停運一段時間，要到今年四月先重開。
同唔少國家地方一樣，印尼嘅低組別聯賽比較難獲大眾關注，你瀏覽主流媒體嘅體育新聞網或揭開報紙體育版，關於本土足運主要都係講頂級足球聯賽嘅消息多，第二級聯賽都唔多會講，第三級聯賽就更少講甚至提都廢事，因為第三級聯賽已經係業餘性質，冇頂級聯賽嘅地位咁重要，由於版位有限及引唔起一般讀者及視眾注意所以唔駛諗主流媒體會無端白事同你講群島聯賽踢成點，只靠主流媒體嘅資訊係無法得知群島聯賽嘅動態，只可以上網另覓渠道搜尋，雖然群島聯賽有官網及Facebook Page，可惜資料唔多齊全，必需要搵埋各球隊嘅網站甚至要碰運氣睇睇球隊根據地嘅地方新聞有冇提及相關消息。
香港有唔少關注本地足球嘅球迷都未必知道甲乙丙組有幾多隊波，其實印尼好多關注本地足球嘅球迷都係一樣，只會留意頂級聯賽，我喺某討論亞洲足球嘅Groups問過幾名睇印尼足球嘅印尼球迷對群島聯賽有乜睇法，有一個連今年有冇群島聯賽都唔知仲要反問我，可見群島聯賽喺一般印尼球迷心目中嘅地位如何。
但係得唔到大眾關注及業餘性質唔代表群島聯賽就冇存在意義及冇人睇，唔少參與群島聯賽嘅足球隊都係地方球隊，甚至比頂級聯賽嘅球隊更加重本土特色，例如有一隊上年參加群島聯賽，來自中爪哇省Kabupaten Magelang(馬格朗縣)嘅Persikama Kabupaten Magelang(佩斯卡馬)咁，隊波冇知名前職業球員幫手，由一班喺Wiki黑字同紅字嘅學生、小販、教師、商人、公務員等所組成，不過球員全數都係馬格朗縣出生，雖然操練次數唔多球員能力又一般，但係好多馬格朗球迷都會入去支持呢班業餘球員，有時遇上好戲碼佩斯卡馬主場Gemilang Stadion更會座無虛席，主場氣勢甚至比某啲頂級聯賽嘅球隊更強勁，只不過踢緊嘅係第三級聯賽主流媒體冇任何報導所以不為大眾所知。
相信對於班球迷嚟講，球賽質素唔係最重要，踢緊頂級定三級唔重要，係咪業餘定職業都唔重要，最重要係佩斯卡馬代表緊嘅係馬格朗縣，馬格朗出生嘅人當然就支持屬於馬格朗嘅足球隊啦，呢個就係佩斯卡馬及群島聯賽球隊嘅存在意義。