9月1日港柬足球友誼賽就快嚟料，港隊公佈決選名單，客軍柬埔寨都公佈埋，門將Sou Yaty（也迪），後衛Sok Sovan（蘇雲）、Rous Samoeun（森馬雲），中場Sos Suhana（舒夏拿）、Chhin Chhoeun（曹雲）、隊長Chantha Bin（陳大斌），前鋒Chan Vathanaka（華雲拿卡）等現役國家主力球員都有見名，但都有部分球員要踢東南亞U19足球錦標賽及受傷冇嚟，當中主力後衛Hong Pheng（洪平）、中場Kouch Sokumpheak（蘇琴菲）及前鋒Khoun Laboravy（拿保拉維）缺陣對柬埔寨國家足球隊嚟講有一定影響，即係話同港隊一樣大家都唔係Full Team。（譯名以hkfa為準）
根據港隊教頭金蛇形容柬埔寨國家足球隊現時水平同台灣差唔多，而我立眼睇過佢哋八九場波，都認同金蛇嘅分析，但喺一啲快速反擊及罰球處理上，柬埔寨可能比台灣做得更好，金蛇應該都好清楚及收到風知道點處理，我預測會係一場攻防戰。而柬埔寨之前對過日本及敘利亞等亞洲勁旅練到唔少嘢，加上陣容唔係最完整前鋒都有威脅最大嘅華雲拿卡，所以港隊後場都未必好輕鬆。
由於網上有太多賽事錄影重溫及有唔少識波球迷對柬埔寨國家足球隊作出深入分析，佢哋班球員有咩特點就唔再多講，不如講講啲冇咩關係嘅嘢。柬埔寨國家足球隊對於我嚟講有啲特別意義，因為1999年亞洲盃外圍賽香港隊主場對柬埔寨係我人生第一次坐喺電視機面前睇晒一場香港隊賽事，由於場波係TVB直播，所以幾咁唔妥TVB都要講返句「沒有TVB，那有今日的弱智13」。
呢場波之前我對香港波其實冇乜點關注及冇乜性趣，平時寫返學週記想高分就抄方向報本地波評老吹自己每個星期都去旺丁場睇波，球迷世界都唔會認真睇，甚至飛去亞視睇浪客劍心算，但可能因為抄得多就算唔係點睇已經記得甲組大半球員名，開始留意真心埋香港波，得知香港隊主場對柬埔寨有直播於是乎就試下坐低睇，一睇完就好似偷窺狂裝人屙屎咁裝上癮無法自拔，嗰時就明白一隊實力咁水皮嘅香港足球隊有乜存在性，明白點解要支持呢隊香港隊，更推動我喺下一場對印尼嘅賽事第一次入場睇波，之後就墜入港足嘅荒淫世界睇埋本地聯賽，所以睇見柬埔寨我就會諗起香港隊，呢次對疊又勾起我唔少回憶。