體育

俄羅斯足壇的小數民族

廣告
俄羅斯足壇的小數民族

廣告

前身係乙組,現時叫Russian Professional Football League(俄羅斯職業足球聯賽)嘅新一季俄羅斯第三級別足球聯賽已經進行咗幾輪賽事,呢一季係改革以來最少隊伍參與嘅一季,只有五十八隊,大部分球隊集中喺西、中及南部,而遠東賽區只有六隊參加,亦都係近年遠東賽區最冷清嘅一個賽季。

除咗某幾個俄羅斯遠東地區城市因為戰略、政治問題被中央政府重視之外,好多遠東地區都係被嚴重忽視而傾向貧窮,就算職業足球亦一樣,西、中及南部球隊永遠得到較多重視,基本上運作不成問題,就算有球隊財困媒體都會比較多相關報導,好快就會解決事情,但遠東球隊搵水喉方面比西、中及南部球隊都難,甚至地方政府本身對足球嘅支持都有限,有球隊財困好多時只有當地媒體會報導,西面媒體好多時都會因為遠東消息冇咁重要而對其漠視,踢過上俄甲、超嘅遠東球隊通常命運會好啲,但如果唔上唔落嘅就自求多福。

FC Yakutiya Yakutsk(雅庫特雅庫茨克足球會)就係今年冇參賽嘅遠東地區職業足球隊,原因都係同缺乏資金有關,呢支球隊位於俄羅斯聯邦主體之一嘅Sakha Republic(薩哈共和國)首府雅庫茨克,薩哈共和國面積有3,083,523平方公里,佔俄羅斯聯邦總面積18.17%,位處西伯利亞嘅東北方,與楚科奇自治區、哈巴羅夫斯克邊疆區等遠東地區相連及接壤,部分土地位於北極圈內,盛產鑽石之外仲有大量豐富天然資源,亦係遠東比較寒冷嘅地區之一,夏季時有十度已經算''熱'',人口約一百萬,雅庫特族呢個突厥語民族係當地主要民族,人口約五十萬,係薩哈共和國嘅真正本土民族,屬黃種人,而俄羅斯族就係當地第二多民族,人口約四十萬。由於黃種民族較多,加上土地廣闊,所以有人話薩哈共和國係繼中國外世上第二大黃種人國家,雖然係俄羅斯聯邦主體成員之一,但薩哈共和國都算係一個國家,只不過唔係一個有獨立主權嘅國家。

講到呢度,大家應該都會覺得雅庫茨克或薩哈共和國並非一個貧窮首府或聯邦主體成員,因為佢有好多天然經濟資源,比起好多遠東地區都要豐富,只不過資源所獲得收入中絕大多數都被中央政府收繳,落到當地人袋嘅唔多,情況就如印尼加里曼丹四個省咁有豐富天然經濟資源,但當地大部分當地人係享受唔到幾多成果,依然有大量貧民存在。天然經濟資源豐富亦唔代表足球業都會受惠,最重要係當地對足球業有幾重視,薩哈共和國當地冇西部咁流行足球,入場球迷唔多,雅庫茨克足球會呢幾年只能苦苦維持運作,上季更因為冇錢作客而被俄羅斯足協重罰。

因為資源所獲絕大多數都被中央政府收繳,所以近年薩哈共和國有人提出以公投運動脫離聯邦真正獨立成國,但中央政府當然唔想失去呢塊肥豬肉,一定會用盡方法阻止,因為只要薩哈共和國真正獨立,對其他有脫離聯邦之意嘅遠東聯邦管區成員甚至南部聯邦管區、西伯利亞聯邦管區、南部聯邦管區、北高加索聯邦管區或伏爾加聯邦管區嘅成員都係一支強心針,到時個個都話要成為主權國家搞到大內戰,俄羅斯咪好唔得掂?四分五裂唔係最大鑊,財源喪失先係嘛!所以細心留意就會發覺中央政府從未忽視遠東地區,但講緊嘅係資源所獲而唔係當地民生大小事,嗰啲普京理得你死啦,特別係你係有色人種會受到更多歧視。

講起人種,喺香港提起俄羅斯好多人只會諗起白種人,早幾年有一名俄羅斯前鋒叫Stanislav Korchazhinskil嚟到香港流浪隊試腳,由於佢係黃種人所以引起少量球迷好奇,留下「邊忽似俄羅斯人」等疑句。其實Stanislav Korchazhinskil係來自遠東地區嘅黃種人,嚴格上都係俄羅斯人,只不過香港普遍人認為俄羅斯人都係白種人,但漠視遠東仲有鄂溫克人、埃文人、雅庫特人、布里亞特人、圖瓦人等黃種人生活緊,可能俄羅斯中央政府由東斯拉夫民族話事令外人對俄羅斯人只有一種印象,但唔止外面世界係咁,俄羅斯圍內主流世界都漠視呢班居住遠東嘅黃種俄羅斯人,所以除資源不均外點解會有脫離聯邦聲音呢?咪就係呢啲膚色因素囉。

講返足球,因為俄羅斯聯賽講求體格,遠東地區黃種人比較瘦及矮細,要喺俄羅斯足壇立足一啲都唔易,除非有超強技術,大多數黃種人球員只能踢第三及第四級別聯賽,要踢上俄超就更難。遠東地區嘅職業足球隊大部分球員都係居於西、南部及當地出身嘅東斯拉夫人,黃種人球員唔常見,而薩哈共和國嘅FC Yakutiya Yakutsk(雅庫特雅庫茨克足球會)喺上個賽季正正因為缺乏資金而重用本地人,九成球員都係喺薩哈共和國出生,不過絕大部分係東斯拉夫人,只有一名球員係雅庫特人,佢就係中、前場球員Михаил Никифоров(Mikhail Nikiforov),呢位真.本土派球員一直效力雅庫茨克足球會,雖然效力時間只有六年,但已經係隊內老大哥,仲做埋隊長,即使只有一位雅庫特人球員但對於球隊嚟講佢嘅存在都有一定重要性,最少話畀人知仲有遠東地區黃種人球員喺俄羅斯踢職業足球。

廣告