朱米高

傳媒人,基督徒,曼聯迷,識少少音樂 網誌

社運

千祈唔好絕望

千祈唔好絕望
廣告

廣告

見到fb上好多朋友心灰到極,我都唔例外,不過千祈唔可以絕望呀!

而家嘅實況係:中共嘅政治能量係100,而香港人只有1,1係一定鬥唔赢100,就好似想用單車撞冧IFC,一架單車同一千架都唔會成功,實力根本太懸殊。

我曾經講過,要打破香港嘅政治死局,需要等待大陸出現x factor,即係出現大改變例如「支爆」一如經濟大衰退、中共內鬥出現變數、國際形勢大洗牌等,咁先有機會令中共嘅實力由100變成70、50、30,呢個x factor,香港人實在冇乜辨法參與製造。

咁係咪望天打卦,等天收中共?當然唔係!抗爭可以暫停,思考就一定唔可以,呢段時間,要不斷思考、反省、吸收,做個有智慧嘅抗爭者。無智慧嘅抗爭,議會內外大家都見唔少,唯有不斷自省,先可以更加認清形勢、更識選擇抗爭嘅路線。

但係,聽清楚,我唔係話呢段日子要停止一切行動返屋企冥想。行動係要不停咁做,但要將個目標fine tune一下,既知道實力懸殊下,無論幾十萬人和理非靜坐又好,用磚頭掟差佬又好,都難以做成制度嘅改變,所以不妨調整目標,反問一下,咩手段可以儲集更多嘅政治能量,例如嬴得更多非支持者嘅諒解而唔係只贏得支持者嘅掌聲?我地期望中共嘅實力由100減到30,咁我地自己都要由1升呢到5、10、20,咁先可以有得鬥。

係人都想一日就改變一切。但同極權鬥,太心急嘅結果,可能係加快自己嘅灰心,唔記得等待嘅重要,繼而令自己嘅言行變得晦氣,於是出咗啖氣就當嬴咗。孫中山十次革命先成功,用文字寫,唔駛一秒已讀完「孫中山十次革命」呢幾隻字,但實際上十次革命前後經歷十六年。今日係灰,但千祈千祈千祈唔好絕望!

廣告