今屆鈴木盃最大驚喜隊伍一定係印尼，因為賽前不被睇好，甚至被擋作魚腩，除咗受到好評，更引起部分喺海外出生嘅血統球員''主動出擊''，好似現時效力阿積士青年隊嘅前鋒Ezra Walian就向印尼媒體放風有意代表印尼出戰，呢位前鋒今年19歲，喺阿姆斯特丹出生，入選過荷蘭U15及U17隊，阿爸係印尼北蘇拉威西萬鴉老居民。
呢類有資格入籍印尼嘅海外血統球員喺歐洲有唔少，要入籍印尼首先要有印尼血統，其次要得到印尼政府批准，移民局先會搞護照，亦要放棄原國籍，由於只承認單國籍，所以尋找海外出生嘅血統球員方面印尼係比菲律賓蝕，其實印尼''播種力''唔比菲律賓弱，不過印尼足協並非見''鬼佬樣''就起機，特別係鈴木盃以本土派為主取得好成積後，已下定決心主力搞好本土青訓，必要時先會考慮比海外出生嘅血統球員及喺印尼連續居住5年以上嘅外援球員歸化及入籍。
即使鈴木盃只係東南亞圍內飛機盃，但一班印尼本土派球員都算爭氣，最少可以話畀其他人聽本土派足球員係唔差嘅，而再北望返香港，香港隊踢省港盃同樣起用本土派足球員，而且有唔少球員因傷及各種因素退隊，補選咗幾位同港隊冇乜緣分嘅本土派球員，即使省港盃並非國際賽，但依然有一定影響力，所以如果想證明本土派球員都唔差嘅話，就要好好把握機會大打爭氣波，特別係幾位只能勉強掹車邊嘅球員。