聽日傑志對河內FC嘅亞冠外賽事會喺大球場上演，傑志除咗有猛援仲有幾名歸化兵，仲有主場之利，所以普遍球迷都對傑志充滿信心，而對家今次唔齊腳，不過一樣擁有歸化兵，佢就係球隊首席射手Hoàng Vũ Samson（黃武森臣／信），呢位前鋒原籍尼日尼亞，喺越南征戰多年嘅球員，曾被馬德里體育會簽下，不過因為各種原因重返越南效力河內，6年來為河內射入超過70球。
而佢近年歸化成為越南球員，並改名為黃武森臣，上年曾有風聲指越南足協考慮畀黃武森臣入越南國家隊，搞到出現兩類意見，一類係支持黃武森臣入越南國家隊為越南而戰，認為既然批准佢歸化，就應該視佢為自己人。另一類係反對黃武森臣入越南國家隊，認為越南國家隊只可由越族或其他土生球員及血統球員代表出戰，最後越南足協宣佈越南國家隊短期內唔會選歸化兵入伍，原因係越族或其他土生球員已夠數支撐越南國家隊，所以國家隊唔需要黃武森臣等歸化兵。
其實黃武森臣曾經入選過越南國家隊集訓大軍，越南足協亦曾經批准歸化兵入國家隊踢國際賽，但早已成為歷史，不過依然容許外援申請歸化，只要喺越南長居五年或以上就可以申請，但必須放棄原國籍，而且要通過語言測驗，唔識越南話就無法歸化，有部分喺越南長居五年或以上嘅外援因為唔想放棄原國籍所以只申請身分證，有越南身分證喺聯賽可視作本地兵，不過代表越南球隊出外就唔會被視作越南球員。
對於黃武森臣應否入選越南國家隊現時仲有爭議，不過睇見越南國家隊以本土兵砌低敘利亞及北韓，某程度都明白越南足協內部點解咁反對選歸化兵入國家隊。（不過對印尼都係輸波）