體育

印尼聯賽場場萬萬聲?邊個同你講㗎?

廣告
印尼聯賽場場萬萬聲?邊個同你講㗎?

廣告

今朝講起印尼嘅低組別聯賽球隊有相當可觀嘅入座情況,好可惜並非所有低組別球隊嘅球市都係咁火爆,例如北蘇門答臘球隊PSMS棉蘭咁。

呢隊棉蘭隊係印尼足球壇中其中一支好有影響力嘅球隊,特別係喺蘇門答臘島中,吹雞能力數一數二,棉蘭市人口200幾萬,對比好多人口只有20-30萬嘅小城球隊,棉蘭隊嘅優勢就係有個比較龐大嘅市場,而且棉蘭本身係蘇門答臘島嘅重要城市,呢啲因素令棉蘭球市喺曾幾何時非常火爆。

可惜近年棉蘭隊財政出現問題,缺乏資金買好球員下令到球隊長期要喺低組別聯賽生存,而入場球迷亦不斷減少,今季棉蘭參加乙組聯賽,雖然喺地區小組賽超班,不過主場賽事平均只有3000人入場,同昔日喺頂級聯賽一票難求嘅情況唔同。

平均3000人入場對棉蘭呢支“大隊”而言係嚴重唔合格。

點解棉蘭唔可以好似泗水咁,落到低組別依然引到一大批死忠入場呢?我諗同球隊宣傳功夫及長年腐敗有關,首先棉蘭一向好少搞宣傳,可能以為有天然地區吸引力呢個市場一定死唔去,但現今世代宣傳呢一項好重要,因為可供消閒其他活動愈嚟愈多,入場睇足球再唔係最大消閒活動,另外球隊腐敗嘢實在太多,呢啲都傷盡球迷嘅心,令入場球迷愈嚟愈少。

不過就喺乙組聯賽開波之前,棉蘭同幾支甲組聯賽球隊友賽,通通爆滿,堅係場場幾萬人,咁就代表棉蘭足球唔係冇人睇,而係因為喺低組別競爭力冇咁大所以球迷選擇性入場。

其實睇見棉蘭搞成咁覺得好唏噓,作為一支喺蘇島甚至成個印尼都咁有影響力嘅球隊卻搞到主場場冷清清,仲記得棉蘭喺頂級聯賽降班後棉蘭市立即爆發球迷騷亂,降到次級初期主場依舊火爆,但一次又一次令球迷失望,嗰啲盲撐派都開始頂受唔住,眼睛康復後都失蹤了。

廣告