印尼峇里聯一張三種宗教三個民族喺球場共同答謝各自信仰嘅圖片已流傳海外多個國家，儘管近年印尼種族及宗教關係比較緊張，但大部分外人對相片都有好高評價，峇里聯知名度亦增加。可能有樣學樣，唔少印尼球隊突然顯示自己都好和諧同包容，其中乙組一支來自西加里曼丹省坤甸市嘅球隊Persipon Pontianak（佩斯邦）都唔執書，喺非官方社交網發佈一張圖片，顯示隊中有4位不同種族嘅球員合照，分明想食水路話畀世人知自己一樣咁包容大家快給like關注（及捐錢資助苦苦經營嘅球隊），有爪哇族，巴布亞族，馬都拉族及華族，雖然呢4天王並非加里曼丹土著，但爪哇，馬都拉，華人都喺坤甸生活咗好耐，其中華人人口佔全市最多，一直以來都對坤甸發展好重要。
Persipon雖然係跟風，但另一角度睇都係可以發放正面訊息，話畀大家知坤甸呢個城市有不一樣嘅膚色文化宗教存在都可以和平共存，呢一年坤甸喺種族及宗教問題上係比較緊張，情況令人憂心。
不過唔咁樣自爆跟本唔知Persipon原來有華人球員，我一直以為呢隊波以一個有咁多華人生活嘅地方做根據地卻連一位華人球員都冇，呢次我錯喇，圖中嗰位華人球員叫Hengky，基本上唔爆出嚟會以為佢係當地土著，因為好多華人改咗印尼名，我相信有啲球員係冇對外公佈自己係咩種族，廢事麻煩吧，即係話現存印尼職業足壇嘅印尼華人球員，可能唔止咁少呢。