現時舉行緊嘅東運會男子五人足球奪金大熱係泰國，由2007年成為東運會項目後泰國已三次奪金，再睇亞洲錦標賽成積一向唔錯，經常能夠打入四強，東南亞錦標賽更係屈晒機，講細波泰國絕對係亞洲一線勁旅，所以今日東運會男子五人足球小組賽泰國對印尼幾乎冇人睇好印尼，因為印尼男子五人足球成積一向唔算標青，而且荷蘭人Victor Hermans接手球隊後有幾位主將落選，但最終印尼爆冷贏泰國4比1，嚇到球迷瀨屎。
熱愛韓流文化嘅Bambang Bayu Saptaji係其中被公認技術最好嘅一位印尼男子五人足球隊球員，曾經外流中國加盟大連元朝隊，成為印尼五人足球史上首位效力中國球會嘅球員。佢一直都係印尼五人足球國家隊進攻核心，不過Victor Hermans就指呢位好波之人狀況唔太好，其他幾位主力如是，寧願起用新人，呢個舉動當然惹起一部分關心印尼五人足球嘅球迷不滿，不過今日一戰就令所有反對佢嘅球迷收皮。
喺東運會史上，印尼男子五人足球隊從末奪過金，但喺東南亞圈內計都算係一支勁旅。而教頭Victor Hermans來頭唔細，曾經係1989年國際足協室內五人足球世界錦標賽神射手，1992年成為香港男子五人足球隊教頭，帶領香港出戰由香港做東嘅國際足協室內五人足球世界錦標賽，大家又有冇印象？