正當香港足球界因為愈來愈多歸化兵而引起爭議，另一邊廂印尼都喺最近增添一名歸化兵，佢就前早前傳過有機會去香港發展嘅黑山前鋒Illija Spasojevic，呢位球員喺印尼踢咗超過5年，2016年去大馬揾食效力馬六甲，為球隊射入24球成為當届聯賽射手，係馬六甲升班功臣，最近成功取得印尼公民資格，呢位印尼語講得非常流利嘅前鋒已經表明願意為印尼隊效力，由於印尼國家隊前線力量最近喺友賽曝露唔少弱點，年青一輩仲爭啲經驗，老將又走下坡，所以有唔少球迷都希望西班牙教頭Milla喺印尼隊下一場友賽對圭亞那可以試吓用佢。
其實由2010年至今，有16位外籍球員成功申請成為印尼公民，當中有10位係有印尼血統，另外仲有一位荷蘭球員，一位日本球員，一位巴西球員及烏拉圭球員申請緊或考慮申請成為印尼公民，而教頭係可以揀晒佢哋入隊，若果強行砌一個陣容，相信只有門將係土生，印尼隊可以比香港隊更洋化。
不過，今年入選印尼國家隊嘅歸化入籍兵只有2位，就以近排友賽柬埔寨嘅名單上睇，只有Lilipaly及Bachdim係來自荷蘭，咁多冇入選當然有原因，例如前大埔球員安杜已經歸化成為印尼球員一年，最近亦有一定出場次數，表現唔差，但喺同樣位置上，唔少本土球員都唔差過佢，所以佢仲未有機會，而萬隆隊荷蘭血統中場Maitimo 今季踢得非常好，不過因為年紀問題所以冇入選，其實只有33歲，但教頭寧用20出頭嘅小將。仲有啲歸化兵因為狀態及傷患被遺忘，好似原籍喀麥隆嘅高大中堅Bio咁，都係最近先喺球隊入面有得出下，所以就冇入選。
雖然印尼足總喺呢7年內派咗10幾本護照，但內部係有個指引，就係如果班歸化血統兵係有把握可以令印尼殺入世界盃32強，話知你選晒全隊非本土，但現時班歸化球員當然冇呢種能力，所以每次選國家隊球員，非本土出生只佔1-2個，以少帶多，係有些少保護政策，教頭或多或少受到壓力，未能放心選球員。
要用歸化定全本土，都係印尼足球界一個爭議話題，印尼足總喺年初曾經要求以U22代替大國腳，結果主場不敵緬甸，進一步更極端起用全隊U19做大國腳嘅大計因為壓力幻滅，現時國家隊以少數狀態極佳嘅歸化球員配以本土球員示人，未來會否增加歸化球員就要睇狀況，以前線及後防而言係有需要，但中場方面本土其實有好多出得大場面，可惜唔知咩原因永遠有啲球員踢到曉飛都唔會入選。