Momay

我係熱愛足球嘅油漆佬。 網誌

體育

印尼波,可以很好踢

印尼波,可以很好踢
廣告

廣告

睇印尼波,經常可以見到啲踢過香港聯賽嘅外援,冰河期時賓曹、卓卓、羅渣、穆沙、維雅芭、基夫都過咗去印尼搵食,之後亞古沙、法比奧、高田壽典、施迪、皮利斯、深澤仁博亦轉去印尼發展,近年有巴倫古素、加藤友介,亦有好多喺印尼直接過檔來港,90年代有狄恩,近期有巴域斯、卡錫及盧域捷,印尼同香港聯賽一向有好多緊連關係。

不過踢得掂香港聯賽未必代表踢得掂印尼聯賽,踢得掂印尼聯賽未必代表踢得掂香港聯賽,有時要講適應同默契,賓曹喺香港撈得起,但喺印尼只係普通貨色,穆沙、維雅芭代表所屬球隊喺香港聯賽有良好表現,但喺印尼完全冇料到,亞古沙、巴倫古素、法比奧都被眾多印尼球迷評為水貨,反而羅渣喺香港麻麻地,一去到印尼就成為球隊神射手,高田壽典雖然喺印尼只踢弱隊兼失咗好多波,但表現仲係受到一眾球迷讚賞,而印尼空運過來香港嘅一樣好多水貨,當中亦有好嘢。

究竟保贊喺印尼萬隆命運如何呢,真係好難估,純睇佢喺香港嘅表現,應該冇咩問題,但要喺印尼聯賽立足,係會有一定難度,印尼聯賽水平唔高,但有啲外援去到唔習慣當地生活及比賽風格,影響表現,就算係踢過英超德甲嘅某些過氣國際球星,去到印尼都冇貨賣。

林學曦踢佩斯查,引來印尼球迷唔少好評,覺得佢比起某些印尼球隊請返來,踢過南韓、日本頂級聯賽嘅南韓、日本球員好,香港球迷都呆了,乜原來印尼聯賽水平咁低?巴倫古素加盟萬隆後,我哋對佢好有信心,但半季未試過喺聯賽入波,連佢自己都話比想象難踢。

印尼波,可以很好踢,亦可以好惡踢。好似基夫呢啲喺香港、印尼都屈晒機嘅外援,好少好少。

廣告