立即捐款

Momay

我係熱愛足球嘅油漆佬。 網誌

體育

印尼聯賽去非化

印尼聯賽去非化
廣告

廣告

印尼甲組足球聯賽揭幕日期由二月尾改為三月頭之外,賽會PT LIB最近仲頒布咗一項新規條同非洲外援球員有關,首先講吓非洲球員同印尼足球有乜關係,長久以來都有好多來自非洲嘅球員去到印尼尋找機會,由於部分非洲球員人工平,所以唔少貪平同冇乜錢嘅印尼球隊都願意起用佢哋,有一段時間非洲球員數目喺印尼進入氾濫階段,但係當中有唔少質素參差。

為咗提升印尼聯賽質素,2008年印尼超級聯賽成立時賽會頒布引援制度,規定喺印尼超聯註冊嘅非洲球員一定要係踢國際A級賽嘅國腳級球員,所以好快印尼超聯就有唔少利比里亞國腳級球員出現,當時利比里亞國家隊出戰國際賽最誇張有七成球員都喺印尼踢波,不過呢批國腳級外援並冇對印尼聯賽水平帶來改變,有啲喺印尼更係愈踢愈差,最終呢項引援制度因為成效問題取消,印尼球隊簽非洲球員唔再需要睇CV,非洲球員再次成為印尼大多數,喺印尼聯賽分裂時外援需求極大,兩個頂級聯賽加埋兩個次級聯賽合共已經超過50位非洲球員註冊,仲有好多冇班落留喺印尼做黑工嘅,可能有成百人,佢哋來自喀麥隆、尼日尼亞、加納、利比里亞、科特迪瓦、南非,甚至係塞拉利昂,不過唔使多講,有好多非洲球員質素好差。

近年印尼球隊流行簽巴西外援,主要係又平又靚又正,非洲球員喺印尼聯賽嘅數目開始减少,好似上年咁出現過喺印尼甲組入面就只有13位,今年暫時只有7位非洲球員註冊咗,大部分都係現役國腳及前國腳,不過因為有前科,為咗保證外援質素,賽會PT LIB就喺近日頒布針對非洲球員嘅引援規條,宣布今季印甲除咗早前已經註冊嘅7位非洲球員,喺規條生效後有關國籍嘅球員唔可以喺印尼踢,呢條規條係話今季印甲只容許5個非洲國家嘅球員去印尼踢波,包括剛果民主共和國、埃及、阿爾及利亞、突尼西亞及蘇丹,而且一定要喺該國頂級聯賽效力當中。

如果有留意非洲足球嘅波友應該都知呢5國嘅足球聯賽喺非洲計係比較有規模,當然仲有摩洛哥同南非都好似樣,賽會希望咁樣可以杜絕低質非援,不過其實咁做等同杜絕非洲球員嚟印尼踢波,喺得呢5國嘅頂級聯賽踢波都唔使去印尼發展,就算外流去亞洲都係去中東國家多,揀巴林科威特都未到印尼,而規條中有例外可以容許非5國嘅非洲球員喺印尼註冊比賽,就係嗰位球員要喺歐洲大球隊踢過,好似艾辛咁,邊有咁多豪門,即係迫其他球隊繼續揾巴西外援。

廣告