立即捐款

Momay

我係熱愛足球嘅油漆佬。 網誌

體育

印尼足球不缺門將,但沒有穩健的門將

印尼足球不缺門將,但沒有穩健的門將
廣告

廣告

今日印尼東加里曼丹省省長盃繼續開波,由上季印甲降班分子Persiba Balikpapan主場對Sriwijaya FC,雖然有主場之利,但因為印尼乙組唔容許有外援註冊,所以Persiba Balikpapan係以全印班出戰,而Sriwijaya FC雖然唔係以最強陣容出擊,正選只有柳鉉口一位外援,不過人腳上差太遠,都足夠吊打人腳幾乎同上季唔同嘅Persiba Balikpapan。

一開波Sriwijaya FC就控制戰局向主隊強攻,Persiba Balikpapan只能靠反擊嘗試偷雞,比賽強弱懸殊,但Persiba Balikpapan今日有位球員表現非常好,佢就係門將Fajar Setya。

Sriwijaya FC今日有好多次中龍紀錄,不過差唔多畀Fajar Setya撲晒,連12碼都救埋,只可惜去到80分鐘因為出迎失誤失波,最終Persiba Balikpapan輸一粒。

Fajar Setya本身喺印尼唔出名,今年22歲但早前一直效力乙組球隊PSIS Semarang,係球隊根據地Semarang(三寶壟)土生土長嘅人,不過由2014年起佢只係球隊第三選擇,同時佢係一位建築工程教育系大學生,上年畢業後佢冇即刻轉行,選擇繼續踢,可惜PSIS Semarang升甲冇帶埋佢,但二月初Persiba Balikpapan就邀請佢試腳,好快仲簽埋約。

雖然佢只有168cm,但今日展現出強勁彈跳力,可惜始終太少上場冇乜經驗,出迎時間甚至手勢都係怪怪地,不過會唔會得一場貨仔真係天知道。印尼足球現今最弱一環係門將,兩個職業聯賽嘅門將數目加埋唔少,不過正正路路嘅我自己覺得好少,好多印尼門將反應都幾快,但狀態幾乎都係飄忽不定。

現時被公認最優秀嘅印尼門將係Persija Jakarta嘅Andritany Ardhiyasa,呢兩年佢係比較穩定,但間唔中以為自己係甘波斯,試過出去界外玩波出事,另一個被公認優秀嘅仲有Arema嘅Kurnia Meiga,佢身型就Fit,曾經幫印尼隊救唔少波,但呢一年沉晒,而接班人方面,Satria Tama呼聲好高,但有時會發波瘟,唔知Fajar Setya又會唔會彈起呢?

廣告