立即捐款

Momay

我係熱愛足球嘅油漆佬。 網誌

體育

印尼波真係場場幾萬人入場?

印尼波真係場場幾萬人入場?
廣告

廣告

「香港應該向冰島學習」呢句說話令港足正常佬同街外客喺網上格劍,街外客表示「香港波咁撚垃圾睇你老母咩」,而正常佬就回覆「印尼足球都好垃圾,咁但點解聯賽仲係場場幾萬人入場?」。

印尼波垃圾係事實,但印尼聯賽冇咁犀利可以每隊做到萬萬聲,今季印尼甲組暫時最旺嘅球隊係Persebaya Surabaya,最多人入場嘅比賽有5萬, 最少都有2萬,而最少嘅就係軍方球隊PS TIRA,平均得2千人入場,對住Perseru更只有154人入場。

印尼球隊嘅入場人數可以咁極端,全因兩樣嘢,第一係地方歸屬,第二係歷史文化,好似Persebaya Surabaya喺1927年已經成立,係印尼最大城市泗水歷史最悠久同最有代表性嘅足球隊,由於係代表泗水呢個大城巿,喺泗水獲得終身認可,所以就算球隊成積麻麻都唔會點流失球迷,2009-10年印尼超級聯賽泗水隊就曾經降班,但降班後入場人數依舊,佢哋有晒條件喺到,只要得到球迷認可,就算再落一級,只要遇上好戲碼,要吸引4至5萬人入場係唔難。

而PS Tira喺近年先成立,但因為係軍方球隊冇地方城市背景,所以好難吸客,今年佢哋租咗中爪哇城市班圖爾嘅Sultan Agung Stadium嚟用,希望係班圖爾落戶吸引當地人入場,好可惜大部分居民都冇興趣睇佢哋,因為都揾唔到一個入場原因,隊波乜嘢都冇做就直接空降,然後聲稱自己代表班圖爾,結果入場人數小貓幾隻,就算最多人入場對Persebaya嘅聯賽,場內9成人都係Persebaya嘅球迷。而班圖爾本身有支官方球隊叫Persiba Bantul,雖然話踢乙組,但平均入場人數係PS Tira幾倍,大家共用Sultan Agung Stadium,點解差咁遠?

好簡單,例如我係沙頭角居民,當然支持沙頭角隊,沙頭角人當然撐沙頭角隊,但忽然整隊香港公安隊嚟用沙頭角球場做主場,聲稱代表沙頭角,期間又咩宣傳都冇做,我就覺得你冇誠意先,其次你只係代表公安,關沙頭角咩事,我入條春?

不過點都好,印尼聯賽一定唔係場場萬萬聲,而將香港嘅例子套落印尼嗰度都唔適合,印尼甲組聯賽有啲比賽水平分分週差過港超聯,但好唔好睇對於班印尼球迷嚟講係其次,入到場就係為自己地方吶喊嘅時候,嗰種感屬感香港地區係冇得比,而印尼某啲球隊對碰涉及民族世仇等,呢啲因素令比賽更加刺激,例如印尼經典老打吡Persija Jakarta對Persib Bandung,背後就涉及兩個西爪哇重要城市多年來嘅競爭,有好多歷史故事令比賽更為刺激,好唔好睇就只係場波一部分,同香港根本就係兩個世界。

廣告