立即捐款

Momay

我係熱愛足球嘅油漆佬。 網誌

體育

印尼國家隊首選門將中降?

印尼國家隊首選門將中降?
廣告

廣告

開齋假完咗印尼甲快車又開,而轉會窗都跟住開,有龐大球迷群嘅東爪哇省球隊Arema(阿雷馬)開皮至今唔多掂,現時暫列聯賽榜尾三,球隊管理層將主教練Joko Susilo調任助教,請咗斯洛文尼亞教頭Milan Petrović領軍,又同有頭冇尾嘅黑山中場Balša Božović解約,正當球迷們以為球隊會請一位踢前鋒或中場嘅外援去改善把握力時,管理層搵返嚟嘅新援居然係一位門將,呢位新援名叫Srdjan Ostojic,來自塞爾維亞,上季效力塞爾維亞超聯球隊FK Zemun,不過上陣機會唔多。

球迷們知道外援可能會係一位門將時都好失望,因為阿雷馬今季主要起用嘅印尼本土門將Ribowo同Rusdiana都唔算差,球迷們覺得其他位置更需要外援,就算冇一個比較穩嘅門將,都可以簽返Kurnia Meiga,一位效力阿雷馬十年,喺今年先約滿閃人,2013年至2016年印尼國家隊嘅首選門將。

不過呢位印尼門神因為患病休養,佢拒絕透露自己乜病,就如人間蒸發一樣喺印尼足壇消失,有傳聞佢中降頭,隻眼經常好似畀隻鬼手掩住間中睇唔到嘢咁,而科學啲嘅傳聞就係話佢患上一種罕見病,但點都好,現階段Kurnia Meiga係唔會蒲頭,如果Srdjan Ostojic正式簽約,咁佢就係今季印尼甲第二位外援門將,另一位係效力Mitra Kukar嘅南韓球員柳在勳。

雖然近年印尼出產嘅門將質素一般,但註冊名額有限,一般球隊都唔會搵外援門將,除咗柳在勳,對上出現喺印尼足壇嘅外援門將要數到2015年,當時Persipasi Bandung Raya陣中一位外援就係來自拉脫維亞嘅門將Deniss Romanovs。

廣告