＊ ＊ ＊
楔子
Frankie（右）和《逆流大叔》導演陳詠燊都在演藝學院畢業，嘗受教於影評人家明講授電影史。而奇夫（左）和家明都自中大出身，本科皆與電影無涉，卻俱與電影投緣，曾一起共事。
既在同一圈子，港台重拍《獅子山下》時，Frankie 和奇夫都有參與，因而相知。
奇夫對街道和掌故素有心得，深稔電影取景，文章散見於星期日《明報》，編彙成《電影現場之旅》。
轉職前奇夫原擬請食「散水餅」，但為表彰《逆流大叔》，改為送「散水飛」。Frankie 見此，在 FB 留言挑機：「包場呀笨。」奇夫爽快應機。
＊ ＊ ＊
問：點解咁欣賞《逆流大叔》？
奇夫：其實事前對齣戲冇期望。但自命都到大叔嘅年紀，入到去發覺大叔嘅處境，無論家庭、事業同前路，都好有共鳴。
人到中年，畢左業十年廿年，都會遇到轉折，點樣走出困局？我而家都面對轉型，下一份工同以前做開嗰飯完全唔同，轉去類似顧問嘅位置，由零開始。
而且我喺沙田大，由幼稚園到大學到今日依然住喺沙田。有時荷里活會嚟香港取景，但只係當香港做佈景板，拍完就走。
《逆流大叔》拍城門河靚到不得了，對上一套拍過城門河嘅港產片，已經係爾冬陞嘅《門徒》。你要係香港人先會經歷過，知道發生喺邊度。
套戲係有好多瑕疵，唔係好成熟。但工作上無論順逆，睇完都有得著。我覺得包場夠胡鬧，就好似戲內四個主人公，放開自己嘅枷鎖，let go。
Frankie：你入戲院，攞得番嚟嘅嘢都係無形。想睇特技睇飛車睇玩命，咪去睇《職業特工隊》。點解有啲人覺得畀一百蚊入場睇嗰啲嘢先抵？既然價值根本係無形，不如睇一齣有香港心嘅戲。
唔止背景，《逆流大叔》嘅底蘊都係香港，導演同香港連埋一齊。例如用戲謔嘅態度回應獅子山精神；胡子彤為左女朋友放棄體育，都反映而家香港嘅集體意識。
陳導一直師從馬偉豪等比較傳統嘅港產片導演。佢從來唔係學院派，拍小品商業片。以上都令我原諒套戲嘅美中不足。
我明白批評話劇本唔完整，故事線強弱不均，文戲調度簡單，同港台劇差唔多。但我睇左兩次，清楚更多缺點；同時睇到更多優點。例如喺資源限制下，好畀心機拍扒龍舟，用畫面同氣氛渲染龍舟嘅力量。
而且幾個佬之間，對白嘅 chemistry 好強。一齊問「又喊」嘅黃德斌為女定為錢，「中喇」就一齊飲勝。依啲 chemistry 一半要歸功演員；一半要歸功陳導。對白本身要寫得好，演員先演得舒服。
陳導入行做編劇多年，喺片場同演員對戲，掌握到演員節奏，對白先會流暢，依啲都係功力。
＊ ＊ ＊
問：邊個角色最有代入感？
奇夫：我係黃德斌同潘燦良嘅混合體。
我冇喇喇做左管理層，同黃德斌一樣，既要滿足高層；但基層又會覺得你係朝廷鷹犬。我好體會到黃德斌最後要「玩鋪勁」，其實個心貼近基層。
因為職責所在，又要睇住份糧，初時黃德斌成日戴住黑超，就係假裝嘅意象。後來佢同基層打成一片，終於除低眼鏡同西裝，做番一個貼地嘅人。
至於基層男人都會遇到潘燦良嘅處境，住喺公屋好細嘅地方，老婆係新移民，同阿媽住埋一齊。仲有啲無謂嘅幻想。。。
有時男人返工嗰陣反而比較舒服，可以同班兄弟好麻甩，好拚搏；返到屋企都係好濕碎，好囉嗦嘅事，比如呀女問你啲嘢都唔識。我地係睇 mass media 長大；但後生都係睇手機。
戲裡面基層家庭嘅小朋友講普通話，其實中產家庭都係咁，不過係講英文－－最近個仔先糾正我啲英文發音。
Frankie：公屋、新移民、家嘈屋閉。。。係好多香港人嘅生活。成齣戲表現最好嘅就係潘燦良，佢做爛佬真係做得好好。
朋友睇完話，潘燦良同余香凝嘅戲冇鋪排嘅。喂你望住余香凝駛鋪排嘅咩？有荷爾蒙就得架喇。
問：冇錯，雖然主角係吳鎮宇，我喺佢同潘燦良之間掙扎好耐，但始終覺得潘燦良演得最好。
Frankie：吳鎮宇係代表舊時嘅港產片。佢嘅角色最唔現實，做左鄰居嘅湊仔公。但依種痴情男人經常喺港產片出現，佢亦鍾情《英雄本色》等舊片，象徵住香港電影嘅前世今生。
奇夫：梁家輝喺《天台的月光》都係演依種一往情深嘅男人，依套橋港產片已經用左幾千次。
用場景去睇，吳鎮宇參演嘅電影就係 97 後嘅香港寫照。
第一部係林嶺東嘅《高度戒備》，97 年上映。吳鎮宇嘅角色係港大畢業嘅土木工程師，有穩定職業，但賭馬輸錢，於是想打劫馬會金庫。當年吳鎮宇就係由城門河潛水入馬會。
第二部係阮世生嘅《神經俠侶》，05 年上映。吳鎮宇又係演建築師，但因為挫折而半瘋半傻，喺灣仔遊蕩。象徵住精英俾金融風暴打敗，跌落凡塵。
兜兜轉轉廿年，吳鎮宇又番返嚟城門河。
Frankie：你要喺香港拍戲，先能創造依啲緣份。
奇夫：港產片嘅小品愈嚟愈少；荷里活一樣充斥 Marvel 同 DC，其實係入去睇電腦動畫。小品即係冇特技，冇大場面；靠對話、靠處境、靠衝突推進劇情。
Frankie：《逆流大叔》係講班打工仔。好多港產片題材都類型化，警察、大賊、黑社會，同埋一啲離地嘅愛情片，啲人好似唔駛做。香港已經好耐冇打工仔嘅片。
奇夫：表面上係知識型經濟，但前線其實仲有好多工人。《賣身契》、《摩登保鑣》後已經好少打工仔嘅片，因為嗰陣時仲係工業年代。踏入服務年代，香港仲有冇電影講勞資關係？近乎冇，我一時都諗唔到。
＊ ＊ ＊
問：陳導點知你地包場？
Frankie：因為大家都有好多 common friends，而且係聯絡電影公司包場。
但我唔知佢會嚟，臨完場問可唔可以影相留念，先知導演喺出面。原來佢提早嚟到，坐喺 starbucks 一個鐘等完場。而且佢清楚片尾曲邊個音出現，先好推門入去謝票。
雖然睇落氣勢如虹，但套戲嘅成本係九百萬。起碼要有千六萬票房左右，加埋其他周邊，先可以回本。留意係平手，即係冇錢賺。用 X 2 嘅邏輯，票房大約要係成本嘅兩倍，而家離回本仲有好大距離。
我地咁肉緊鼓勵人睇，因為港產片嘅現實就係咁。部戲咁有心，咁得人歡心，都唔能夠為投資者帶嚟回報。而且戲院嘅場次唔多，對港產片缺乏信心。
奇夫：依個係我包場嘅另一原因。上映兩星期後如果冇口碑，戲院嘅場次會收縮得好快。
Frankie：好耐冇聯絡嘅朋友都有嚟睇包場。其中一位朋友搞永續經濟，見到我地玩得咁高興，佢都會效法搞包場，請呂大樂同陳導演對談。唔好睇輕一次包場，會引申出另一個機會。
奇夫：冇架喇，得番啲有心人同傻佬。我只係一個觀眾，如果想繼續睇，就要付出，唔能夠坐喺度，永世做 free rider。
Frankie：香港觀眾可以諗吓，入場想攞咩返去。就算電影有幾多千萬特技，你都攞唔走，攞得走嘅係無形嘅。你僅僅求一百分鐘刺激；抑或有啲嘢能否帶返去生活？我會揀後者。
奇夫：同埋我喜歡部戲嘅 open ending，沙田大會堂搶新娘嘅結果，我鍾意到不得了。以為係老套結局，結果回到現實，完場時我拍爛手掌。
我離開舊公司，新工完全係未知數。係咪會修成正果？唔一定，或者會跌得更痛。但落落大方係第一步，生活仍然繼續。
套戲冇畀你童話式幻想，真正嘅比賽唔係龍舟，而係人生。
＊ ＊ ＊
後記
看過《逆流大叔》，筆者和受訪者一樣，都很明白小本製作的局限，尤其在言志的對白，由於缺乏蘊釀，說時難免顯得斧鑿。
然而整齣電影絕對值得表揚，更須一提潘燦良家中有鄉音的老婆。其實她叫吳鳳鳴，嘗在同流劇團欣賞她演《野豬》的要角，見證過她的非凡演技。哪怕在《逆流大叔》她僅演閒角，但唯肖唯妙的口音依然令人難忘，適如筆者看過《野豬》的結果。
最後不得不承認，筆者最喜歡的角色還是潘燦良。因為自己一生都活在潘燦良的妄想。。。