開心買野、唔開心買野，呢個好似是香港人的定律－但是，點解是買野呢？
商家的陷阱
點解香港人咁鐘意買野？因為返工辛苦嘛，想獎勵下自己很正常。但我想問，是誰告訴你「買野就會開心」？其實咪又是商家。商家話你聽，用左我的產品，就會變靚D、滿足D、開心D架啦！
商家咁話你知，又何嘗唔是因為佢想賺你錢。而另一方面，買野的確是一種快速填補心靈需求的方式，因為佢令你實際上得到D實物、或者用左一D服務，所以你個心一定是會感到踏實左，好似被填滿左咁（但已經有不少文章指出，購買的快樂最多讓你開心一日；一日之後，要點處理件物品呢個問題先麻煩呀）。
跌入萬劫不復的循環
更大的問題是，一旦我地培養左呢個「返工好辛苦呀買野獎勵自己」的Self-Reward Mode，基本上可以講是萬劫不復，因為當你做野越辛苦、你就更想「買野獎勵自己」、結果買更多野。快樂在購物的過程中越來越難以滿足，養大左個「胃口」的結果，是你必須要「做野更辛苦」，先至可以買到果D你想買到的野。
然後，果D野要搵地方擺先是大問題。越買越多的結果，係屋企變得越來越混亂，心情也隨之煩亂；但，煩亂又繼續透過購物去解決和滿足－咁你話，係咪萬劫不復？
難道大家不發覺嗎？從前讀中學，出街15蚊的權記雲吞麵都是午餐恩物；到讀大學、大家就唔想食20蚊頹飯了，可以的話，都是食30幾蚊的中價飯吧；到出黎做野，無4－50蚊一個午餐都落唔到樓、番唔切工就不如搭次的士，又多左D無謂的使費。我唔是要求大家同意食劣食，但的確，15蚊的權記雲吞麵仍然可以餵飽你（兼且仍然可以很好食），只不過是我們漸漸要求更高的生活水平罷了。
即食的快樂、刺激和滿足感
而事實上，當你每日返工放工好撚辛苦，9 點鐘放工果刻個腦完全Function唔到時，能夠得到一樣你想想地要的野（姑勿論是D咩都好），都會令你感到小小開心－呢種開心就好似食即食面咁快，但同時就是食得果15分鐘，有咩營養可言？可以令你快樂幾耐？相比起令個人有思考的活動、與人交流同行，與身邊的親人、愛人和朋友有美好的相聚與溝通，試問邊種開心有價值D？不過顯然地，由於這種快樂需要更多的時間、心機和精神投資，所以自然少D人重視。如是者，大家只嚮往即食的、金錢堆砌的快樂，咁試問個社會邊度會有內涵可言？
回頭講番前言中Opportunity Cost的問題。當我們運用大量金錢、時間去處理「購物」（以及購物後點樣處理件物件）呢件事時，我們又放棄左幾多highest-valued option foregone？這，大概是生活在資本主義社會已久的我們，需要好好思考的問題。