今日有朋友send呢段片過黎問我：「嘩HKU D Hall係咪真係咁架？好癲呀！！」談起大學舍堂，真係一講D回憶就番哂黎。我Year 1 做過 Freshman、Year 2 上莊搞Hall O、Year 3 做組爸組媽（但Year 3 Sem 2就 Quit 左 Hall XD）；但唔計讀碩士，不得不承認自己已經離開左大學一段時間，可能同而家Freshman過的Hall O已經有一段距離（不過聽落 3 大Programme 模式都係差唔多，似乎改變不大）。究竟HKU D Hall係咪真係咁「恐怖」？
片中所談的都係真實的，而且已經是好少少的情況。一日訓到2-3個鐘已經算好，1-2個鐘或者通一兩晚頂都有聽過。唔知而家有無，但我有聽聞有D Hall會要求Freshman有最minimum的訓覺時間，我個人就相當贊成。另外所謂10日迎新，其實唔係十日，應該是夾埋11日，因為仲有所謂Day 0（諗番都覺得好癲，點解要咁...）。因為文太長，決定分上下兩篇刊出。
談迎新—係咪真係有必要係咁？
迎新是Hall的大事。尤記得當時有不少 Freshman（即係我） 分享時用「入Camp」這個字眼，換來的是一眾OC（Organization Committee）D9：而家唔係「入Camp」，呢個唔係「Camp」、唔係「宿舍」、係舍堂（記住係大鬧人既語氣）！要講「過O」、唔係「O Camp」！但完左迎新，其實有不少OC都直認自己9鬧；最慘的是，我當時作為Freshman 以後見到Hall莊班人都有D驚，呢個是第一印象埋下的結果。
有關Cheer Practice，大家真係唔好當玩、做得唔齊唔好又係俾人D9。美其名是為士氣、但諗深一層真係以為自己去左軍訓營咩，烈日當空下不斷Dem不斷Dem真係人都癲。我自問手腳協調相當好就Dem得唔錯、比著D手腳唔協調既人，真係學得好耐又好辛苦、仲要起一個好高壓的環境下學，10日學成40個鐘，為的竟就是要「為Hall付出」、「加強歸屬感」？真的講唔過去...
有關HMO，其實講真係真係唔係個個 D 既，至少當年我做 Freshman 就無被 D 。HMO通常是迎新中段活動，因為搞手會透過頭幾日活動睇下 Freshman 表現，再決定會唔會起MO度「教育」下你，其實簡單講就係睇你服唔服從、接唔接受Hall的呢一套。
我最不能認同迎新的有兩點：1. 學野係唔使「鬧」既，「鬧」係因為大仙們想「鬧」以建立權威。循循善誘可以、但點解要鬧？；2. 訓得太少。訓得太少會引致認知功能下降、減低判別能力、加強洗腦效果，期間仲要做好Chur的體能活動，簡直有危及性命之虞、年內因迎新太Chur入院者不計其數。住個Hall姐、憑咩挑戰人體極限？
談仙制—匪夷所思的次文化
有關「仙制」，我個人住的Hall已經唔算「仙」、有某D非常傳統的Hall係好「仙」，例如梁天琦所處的Richi都是其中一間。唔知堅定流，我就曾聽過Richi Freshman若果唔聽話，半夜會有一堆人衝入你間房「壁咚」你然後大聲用棍敲牆以作訓示；又例如河東亦是較為「仙」的Hall，聽說Freshman在迎新期間夜晚要Dem Cheers Dem 到 Current Final滿意為止先訓得覺，真係幾匪夷所思。
但話說回頭，港大舍堂文化係咪就係會培養一班不問世事只為Hall付出的人？我相信又未必、梁天琦就係一個好例子。舍堂同樣可以好具動員力，去做關於社會的事（不過當然亦可以動具哂D人搞Hall的野而不理世事，呢D永遠是雙面刃）。
以前（其實都唔係好以前…...）有關Hall O的一切，過完 O 的 Freshman 都會有共識，Programme 不會向外張揚。但我覺得科技已越發達，到底仲可唔可以好似以前咁「臭屎密冚」？我認為是相當成疑。另一方面，自由意志呢樣野就代代都有、但新世代就已經更早確立這種想法，會否仍願意受制於 Hall 這種高壓式做法？
待續。