巴西球員，亞洲入面非常多，但國腳級去亞洲三四線聯賽落班嘅個案唔多，十年前印尼出現咗一位國腳級巴西外援，名叫Amaral，一位曾經同羅拔圖卡路士，白必圖，朗拿度一同出戰嘅巴西中場球員。
大部分球迷會記得呢三位巴西著奇人物，但可能唔會記得Amaral，甚至唔認識佢，Amaral曾經喺90年代中代表巴西大國腳出賽，但由於入選大國腳只係短期嘅事，球迷唔記得呢位巴西國腳嘅事蹟，真係唔出奇。
Amaral職業生涯效力過彭美拉斯，賓菲加，帕爾馬，費倫天拿，哥連泰斯等知名球會，球員生涯未段時刻開始踢巴西低組別聯賽，2008年轉投澳洲嘅珀斯光輝，2010年去到印尼發展，效力次級聯賽球會Manado United，一支蘇拉威西北部球會。
Amaral宣布加入Manado United時，轟動咗成個印尼足壇，因為佢係印尼聯賽有史以來最具級數嘅巴西外援，而且一開始選擇效力低組別球會而非頂級聯賽。2011年，Amaral轉投頂級聯賽IPL球會Persebaya 1927，成為必然正選，一個賽季後就正式離開亞洲。
印尼聯賽有好多巴西外援，但大部分都係冇乜名氣，不過名氣定係能力重要？Amaral加入Manado United時，入座率有所上升，雖然冇朗拿度咁威，但都係前國腳，點都會有啲啲吸引力嘅。