本港一位以「敢言」見稱的美藉商人成日都話，普選對商界最不利喎。我諗民主派要說服佢其實都唔困難，只要帶佢去考察下大學裡的選舉，佢對普選一定舉腳叫好。

在大學打滾過的朋友都知道，每年聖誔新春前後，是各U的競莊季節。學生會、報社、系會、屬會等，都會出盡法寶，務求令個公職(加埋可以住HALL個寶貴的幾分)可以搶到手。系會屬會的投票日將近，競莊的朋友就更加唔敢慢落o黎，人人都加緊拉票拉票。

作為在西貢高科技學府混飯吃的一名小嘍囉，本來對上述的年青人玩意就唔多關心的，但剛才食晏去買飯時，才發現大學裡的選舉原來係一件咁「正」既事。小妹由辦公室到canteen短短的三分鐘路程中，已經接過五六份大大小小的禮物，有食得、有玩得、有帶得、有用得、有睇得，我仲以為自己去左美食博覽。額頭刻住「貪心」的我，當然繼續扮純情學生將禮品袋袋平安，你都唔好話唔so呀﹗

贈品就真係大把，要講候選莊的紙玫瑰花，都有五六款比你選擇。但是，講到政綱，sorry，真係好似一張都無(只係收過一張用來釘住d薄荷糖的催票單張)。所以大家唔好再罵在立法會選舉時揚言「唔洗派政綱都掂」的大班啦，佢只係講出左一個大家都唔想面對的現實而矣。

你以為著個d ‘biem’超貼身mk look黑色西裝先型嗎？錯啦﹗依家要著住金色棉襖派砵仔糕先夠潮呀。正所謂大學生就係社會的明日棟樑，睇到這裡，我諗大家都會同意﹕商界玩普選？洗咩驚呀﹗可能真係時代變左。我以前讀書個陣，有個bba候選莊派膠file(一蚊雞一個個d)都比人話賄選，差點要上代表會遺憾佢地支莊。這一回真係想唔認老都唔得羅……

嘩﹗唔好講笑，一陣快d食左marketing soc.個條就黎過期的time out餅干先….