（獨媒報導）今天是六四37週年，往年曾在櫥窗貼上「35/5」字樣及拍賣六四書刊的深水埗獵人書店，今年繼續在店舖內擺放6.4元白蠟燭及「VIIV」字樣紙膠帶，櫥窗則貼上《七年》歌詞「罕見但也許還有」。店內播放的選歌，包括《六月》、《家明》、《十八》、《雞蛋與羔羊》、《生於憂患》、《集合吧！地球保衛隊》等。
店長黃文萱說，和去年一樣，在六四前一周收到警民關係科致電，以輕鬆語調詢問今年有何活動，她回應對方指「冇特別」。被問到今年壓力是否更大，她就說感覺整個香港壓力都變大，自己亦因宏福苑大火看到很多不公，心情較差。但她相信：「唔係淨係話某種表態先係記得某啲嘢，我覺得大家都適應緊香港而家呢個狀態。尤其近一年，我唔覺得大家係忘記咗發生咩事，而係好多壓力、掣肘、恐懼被施加。」
指六四必須有蠟燭 盼大家意會選歌
獵人書店今個月的櫥窗貼上《七年》歌詞，黃文萱表示不想明言原因：「唔係因為唔講得，係想比大家自己get。大家自己估吓，可能係同大家玩嘅小互動。」至於選歌心思，她就說「唔係知道呢首歌係咩，就估到喇咩？」她又表示過往都會在店舖擺放蠟燭，「六四吖嘛，白蠟燭唔係必須嘅咩？」
前年6月初，曾有警員在獵人書店外駐守，抄下出入人士身份證。黃文萱表示近日沒有察覺政府部門特意到訪，巡查頻率與平常相若，今天書店的運作會與平日無異。會否覺得今年對於「悼念六四」的表態較隱晦、低調？黃說：「我明白大家一定會比較，喺我嚟講，主要係諗唔到做咩，主要隨心。如果每年都做一樣嘅嘢係為乜呢？我有時都會問，做咗係咪好有心，唔做係咪好冇心？」
獵人書店今日歌單
壓力變大 「大家都適應緊」
今年會否覺得壓力更大？黃文萱表示：「壓力大咗一定有，唔止六四，一拳書館嘅事、overall成個香港嘅氣氛的確係。書店係（其中）一方面，我諗大家壓力都大，香港壓力大咗，尤其面對飄忽紅線。」
她以宏福苑大火為例：「大家都係想攞個說法，都咁大壓力。」她指大火發生後，至今依然覺得難以接受，看到很多不公和傷痛不能被處理，因此今年心情較差。
黃文萱形容現在自己仍處於「process狀態」：「可能喺大家眼中，我今年冇做好公共嘅東西，但係我自己都係process緊、處理緊而家呢個狀態。唔係淨係話某種表態先係記得某啲嘢，我覺得大家都適應緊香港而家呢個狀態。尤其近一年，我唔覺得大家係忘記咗發生咩事，而係好多壓力、掣肘、恐懼被施加。」
