（獨媒報導）2019年11月警方圍封理大，大批市民前往尖沙咀一帶試圖「營救」被困人士，導致激烈警民衝突。多人被控非法集結罪，其中10名男子不認罪，今（11日）在區域法院續審。案發時為中大生的被告反對控方將其招認口供呈堂，因是在警員威嚇及毆打下作招認。被告稱在廁所遭警員連打腹部3拳，警員質問：「出到去仲有無嘢講？」另外警員曾問被告：「你有無發覺呢排多咗好多浮屍？」被告聞後害怕被打死。控方外判檢控官張建波盤問指：「你聯想到打死你拋你落海做浮屍？你真係咁諗咁幼稚？咁點處理條屍？」，又追問：「大學生有知識，咁幼稚相信，只係因為警民關係差？」被告同意。
中大生反對控方將招認口供呈堂 因被警員威嚇毆打
第九被告周浩泓的大狀反對控方將被告的招認供詞呈堂，因他是在警員威嚇及毆打下作出。被告今日就特別事項作供。
被告稱警員曾問「收咗幾多錢安家費」
案發時為中大三年級生的周浩泓稱，當日警員10760對他稱：「你跟邊個㗎？都唔係第一次入嚟㗎啦，你平時係邊度玩開？今次收咗幾多錢安家費呀？你咁戇X，坐咁多年都肯制嘅？」被告認為警員當他是黑社會，亦「好驚佢屈我」。
被告稱警員曾威嚇「試下掂嗰袋，一槍嘭呱你哋」
其後有一班戴着防毒面具的警員威嚇他及其他人：「你哋呢班暴徒、垃圾！今晚慢慢同你哋玩，你哋唔係好威嘅咩，點解而家啞晒呀？！你試下掂你前面嗰袋呀，一槍嘭呱你哋！」被告聞後感驚慌，希望盡快離開。
被告隨後被女警作出警告，叫他「唔好搞咁多嘢」，否則會即時帶他上庭。不久後，被告見到一批新的被捕人士入來，其中兩人頭部流血，被告感害怕，「唔知係咪警察將佢哋打到咁，驚陣間都打到我咁」。
期間有警員又稱：「你哋最好乖乖地同我哋合作，快啲錄完口供快啲有得保釋走...趁而家有時間諗下點解喺嗰度出現，唔好到時入到去錄口供口啞啞。」
警得悉被告為中大生後稱「中大肯定有你份掟汽油彈」
當警員10760再問及他「你跟邊個㗎？」，被告解釋他並非黑社會，而是中大信息工程系學生。負責第八被告的警員聞後即回應：「你讀中大㗎，前幾日中大單嘢，肯定有你份掟汽油彈，你哋都係當玩遊戲咁。中大玩完啦，無畀人捉，咪嚟理大玩囉。點知今次唔好彩畀人捉到，坐返三五七年出嚟，又係一條好漢。」
被告稱沒回答問題 警指會自己虛構供詞
及後警員10760開始倒出被告背包的物品，並逐一查問。警員問手套是否用來掟汽油彈，被告指沒有回應，警員隨即兇惡稱：「而家問緊你嘢，唔出聲係咪啞㗎？你唔出聲我自己作落去，話係用嚟掟汽油彈。」被告害怕警員虛構，逐回答手套用作玩俗稱「洗衣機」的遊戲機「maimai」。
警員認為被告「無嘢講即係玩嘢」，於是以其身上衣物有催淚氣體為由，帶他入廁所換衫，並稱：「而家帶暴徒入去廁所教育一下佢」，有高級督察隨即回應：「啲暴徒係要教訓一下嘅。」
被告稱遭警帶入廁所 被連續毆打腹部3拳
進入廁所後，被告脫下上衣並赤裸上身，此時警員10760用左手按着其右肩，並以右手拳頭大力打被告腹部，打完一拳便問：「係咪無嘢講？」，接着又再打，總共連打3拳。警員最後舉起拳頭作狀打向被告並問：「陣間出到去仲有無嘢講？」被告感到腹部痛楚及無助，於是稱：「有呀有呀！」
警員見狀表示：「一開始你肯合作咪好囉，唔使嘥我咁多力氣」，又提醒被告：「記住我嗰樣呀！」
被告稱警一度問及「有無發覺多咗浮屍」
當被告要求見律師時，警員10760反問他是否認罪：「認罪先要見律師，唔認罪使乜搵律師呀？」被告稱不認罪，因此不獲安排見律師。被告稱警方自行為他寫口供紙後，他因害怕再被打故選擇簽署。其後警員再問被告：「你有無發覺呢排多咗好多浮屍？」被告害怕自己被打死，變成其中一個。
被告害怕成為被打死成為「浮屍」控方質疑想法幼稚
控方外判檢控官張建波盤問下，被告稱被打後不敢要求看醫生，因害怕會再被打。另外，控方問被告聽到警員問有關「浮屍」時有甚麼聯想，被告想到可能被打死而沒有人知道，當時又不批准聯絡家人。
控方追問：「你聯想到打死你拋你落海做浮屍？你真係咁諗咁幼稚？」被告同意。控方續問：「你唔覺得咁嘅諗法匪夷所思？咁打死咗點處理條屍？」，又追問：「大學生有知識，咁幼稚相信打死咗拋落海變浮屍，只係因為警民關係差？」被告同意。
案件明（12日）續審。
10名被告為：陳以諾（20歲，學生）、羅曉峰（32歲，教師）、蔡希霖（20歲，學生）、杜俊興（31歲，侍應）、鄧子健（22歲，學生）、彭永強（31歲，地盤工）、陳杰風（25歲，無業）、麥俊彥（18歲，學生）、周浩泓（21歲，學生）及葉自傑（23歲，學生）。
10人同被控於2019年11月18日在尖沙咀科學館廣場一帶，連同其他身份不詳的人非法集結在一起。
案件編號：DCCC 854/2020