（獨媒報導）郭裕洪，隊友和朋友都叫他「阿雞」，年輕的隊友會叫他「雞爺」，有球迷曾經嘲笑他是臨記演員，甚至認為他落魄無比。然而，他曾經為香港足球代表隊上場近40場，更替愉園拿過四次港甲冠軍，「係咩？唔覺喎，我一啲都唔落魄，再揀都會踢港足。」
46歲的郭裕洪現職運油車司機，一身大叔味道，但依然好波。這是遲來了至少二十年的訪問，記者相約「阿雞」做訪問，他先是耍手擰頭。郭裕洪是不問世事的那種人，「我從來唔做訪問，咁多年都唔做。你話有咩好講？贏又好輸又好，得又好失又好，都係自己揀嘅。」
記者說，香港足球員的故事值得記錄下來，郭裕洪猶豫了一會說，「嗯，平日要揸車呀，咁你星期三晚，嚟馬鞍山仿真草。」
從未接受正統訓練 因《足球小將》踢足球
今年在丙組聯賽踢永高，郭裕洪在球場上飛馳，依然不減當年勇。三十年前踢愉園青年軍出身，十多年間拿過最佳青年球員獎，亦曾入選最佳11人，郭裕洪絕對不是「臨記」。
家人賣雞，所以郭裕洪的花名叫「阿雞」。他在麥花臣遊樂場踢街波大，從未接受正統足球訓練，小學5年級才接觸足球，正式踢十一人足球已是16歲，後來跟朋友去踢愉園青年軍，啱啱遇著剛剛，入行成為職業足球員。
阿雞喜歡扭波，可以踢中前場的所有位置，翼鋒更是得心應手。因為漫畫《足球小將》，郭裕洪愛上足球，最喜歡的是同樣不喜說話的麥泰來。「唔踢波，可能都唔會做更好嘅嘢。」
他原本打算玩兩年便去投考消防員，在踢了一年青年軍、一年預備組後，「覺得幾過癮，咪繼續踢。」
那些年的愉園，陣容中仍是星光熠熠，梁能仁、梁帥榮和王福榮等；阿雞入行前其實只曾在電視看過一場南華對愉園。踢青年軍那年，愉園贏了預備組聯賽冠軍，郭裕洪和球隊一起去泰國旅行，那是他人生首次出國。
出道一帆風順 入選最佳11人獲快譯通挖角
後來跟一隊到內地集訓，球隊書記喚郭裕洪不如簽約踢甲組。他當時的心態依然是「不如玩兩年」，「嗰陣時覺得出面啲人好撚勁㗎，尤其體院嗰啲，豪豬、晨曦嗰班，我只係踢麥花臣，唔係正規。」
英雄莫問出處，落泊莫問因由。首場替愉園正式上陣的比賽，對手是聲控通，郭裕洪輕鬆攻入兩球反勝對手。他的說法是時來運到，「好似套戲咁做出嚟。喂，即係個天都叫我要踢波，嗰幾年係好順。」
「嗰時消防、差佬，你行入去都請，嗰個年代知你踢波都實請。」出道一帆風順，郭裕洪已打消了投考消防員的念頭，第二年更拿下最佳年青球員獎，「由頭到尾都冇諗過，我做人無乜奢求。」
那幾年的愉園，在香港足球史上值得佔一個章節，華人球員蔣世豪、羅繼華、李偉文、潘耀焯、賴啟卓、范俊業和郭文迪等球員，先後取得五次甲組聯賽冠軍和五個盃賽冠軍；這可能是有今生、冇來世的陣容。
在1998至99年的球季，愉園力壓南華取得聯賽冠軍，郭裕洪入選香港足球明星選舉最佳11人，這裡有一個小故事，原來快譯通曾開出月薪4萬元挖角。「最後無去呀。點解？唔想煩囉，同呢班踢開過癮，老闆又話有長期服務金，又覺得快譯通玩幾年就唔玩。」
郭裕洪在2003年曾入選港隊出戰亞洲杯外圍賽預賽。（來源：愉園足球隊 Facebook 專頁）
攞獎後市道不景減薪一半 兼職送貨
果然，商業大軍快譯通幾年之後真係唔玩。九七後的香港經濟，乃至球圈的市道都很差。球員減薪成為「正常事」。入選最佳11人的一年多後，阿雞原本三萬多元的月薪遭減了一半。他決定去做兼職，「反正我踢得差，你又唔會減我人工、又唔會炒我，踢得好又唔會加我。」
郭裕洪在綠茵場旁揸機攝錄的一幕，是被球迷嘲為臨記演員的其一原因。
「揸車好自由，我鍾意自由嘅工。」在足球以外最愛是去飛車，19歲便考了車牌，阿雞嗜車如命，他在退役後同是揸車搵食。其實在踢愉園的十多年，大部份時間都兼職做運輸送貨。阿雞清晨四點起身送貨，然後便到跑馬地練波。
他說來輕描淡寫，笑言做又三十六，唔做又三十六，但一切都是為了生計。旁人覺得我行我素，更多的是為勢所迫。「啱啱又有咗細路仔，唯有做兩份工，表現一定有影響。踢得都差咗，又係咁受傷。」
在2004至05年的球季，愉園不幸成為四亞王，聯賽、高級組銀牌、足總盃和聯賽盃均是「阿二」。阿雞憶述，球會上下的氣氛差得很，「人哋晨曦四冠，球員平分200萬，愉園就每隻盃得10萬蚊大會獎金，踢波好現實㗎嘛，踢職業足球就係咁。」他在該季季尾離開愉園，因為球隊沒有獎金。後來輾轉踢過沙田和傑志，在職業生涯最後一年，阿雞對晨曦明言，「晨操唔到，出外唔去，你簽咪簽，我玩一年。」
唔恨出名拒做訪問 球衣一件不留
「我唔需要出名，最好就係加人工得嚟唔好出名，哈哈。」那年頭，郭裕洪連無綫節目《球迷世界》的訪問都推掉，多年來都灑脫地做人，他連一件球衣也沒有留下來，「依家儲波褲囉，哈哈，當底褲著囉。」
「你休息吓得啦，原來冇你都得嘅。」為何多年來都不接受訪問？郭裕洪在球圈見盡人情冷暖，尤其受傷的時候，他的心態是「踢得好你咪讚我，踢得差你都咪撚出聲」，「我唔想跌返落嚟嗰陣好似地底泥，亦都唔洗你捧我。」
實力使然，儘管低調仍是有球迷跟郭裕洪索取合照。
寧揸車搵食不教波 踢南華兼任林大輝私人司機
阿雞曾和哥哥開運輸公司，經營凍倉生意，這輩子好像都離不開揸車。四年前加盟南華，年輕球迷重新認識郭裕洪，他依舊表現出眾，試過連中三元。他同時兼任南華足球部主委林大輝的私人司機，「佢請我做司機，順便踢埋南華囉，無咩特別。」
球員退役後轉任教練大有人在，郭裕洪擁有D級教練牌，在退役後沒有教波，原來他不喜歡和人溝通。「我表達能力唔好，唔鍾意教人。你見到依家啲?仔，好似我求你跑，求你踢。我細個唔係咁㗎嘛，呢個係你興趣，我哋好聽教練話。我見到佢哋咁我會炆，hea我又做唔出，咁不如無教啦。」
憶蔣世豪感難過 難忘隊長風範
踢職業足球的十多年間，阿雞不太儲錢，嗜好多的是，去旅行、玩車、改車、模型車和打野戰，「好快就揈晒，一有錢用晒，當無錢嗰時又會搵到下錢，人生就係咁。」人生就係咁，這句子在訪問中至少出現了三次。
上月22日是蔣世豪離世十週年，談到「豪豬」，郭裕洪即時嚴肅起來，「初初係接受唔到，但無辦法，人生就係咁，必然嘅。」「佢好有隊長風範，好波好人，佢係行出嚟就係領袖。我就影相永遠排最後，最好無人發現我㖭。」
曾考慮移民 痛心現況嘆香港救唔返
前年反送中運動，去年「港區國安法」立法，香港從此不一樣。老友潘耀焯近日辭去南華主教練一職，移民英國，郭裕洪苦笑說，自己有一絲想過要移民，但英語不佳，人在遠方可能溝通不來，「遲早 Facebook 都冇，唔洗諗。你依家都俾人踩到上門，遲啲返大陸可能要儲分，唔夠分無得去。」
郭裕洪摸了摸他的頭，咬緊牙關咧嘴的說，「真係堅有（痛心），你點都諗唔到香港搞成咁，無㗎啦，香港救唔返。」
「做了才後悔，比不做而後悔更好。」這是麥泰來在《足球小將》中的金句。再揀一次，阿雞都會選擇踢職業足球，「其實無遺憾，（職業足球）好多嘢唔係一般人可以體驗到，你做消防員唔會有幾萬人睇住你踢波，出外比賽、經歷同見識，普通一份工唔會有囉。」
記者：麥馬高