【獨媒報導】乙組足球聯賽日前發生嚴重傷人事件，前港腳陳耀麟從後踢跌觀塘年輕球員劉俊達，導致對方左膝蓋骨斷裂，需做手術接駁才能走路。陳耀麟至今未有對劉俊達作問候，他的一腳更令正職為教師的劉俊達未能上學，經濟更因手術費而出現拮据。阿達接受獨媒訪問時聲淚俱下，「業餘都可以有夢想⋯係咪？佢咁樣係破壞年輕球員嘅夢想。唔係一定要踢港超嘅大佬先有夢想。我想入波，同球隊攞乙組冠軍，都係一個小小夢想。佢個一腳，我可以話一舖清袋⋯⋯。」
事源上星期乙組聯賽煞科，在花花對觀塘的賽事中，劉俊達左路接應來球快放，先遭花花的王皓雲迎面相撞，陳耀麟再從後踢跌劉俊達。劉俊達需即時乘坐白車送院，
劉俊達（左二）小四便踢足球（相片由受訪者提供）
有為青年 自修重讀文憑試考入科大
24歲的劉俊達去年效力甲組的凱景，今年跟隨兒時教練加盟乙組的觀塘，上陣11場取得5個入球。阿達自小學四年級便踢足球，由於家住沙田，在老師鼓勵下，報名參加沙田區隊，即俗稱的幼苗U12青年軍。踢了一年沙田，第二年和同學一起轉到大埔青年軍。如是者踢了三年大埔，再轉到傑志踢U15和U17青年軍。
傑志青年軍每週練習兩課，阿達一下課，便由沙田沙角邨出發到黃竹坑練習，「一來一回就30幾蚊，對中學生都唔平。」然而，在傑志的上陣機會不多，便再轉到橫濱FC青年軍踢了兩年。
「嗯，之後其實有一段時間無踢足球。」原來，阿達的文憑試成績不好，他選擇自修重讀一年，每日朝八晚十出入自修室。果然，天道酬勤。阿達考入科大化學系，化學科更拿到5**的彪炳成績。他感謝父親的關愛，「爸爸年事已高，係地盤散工，但都特登留咗萬幾蚊畀我補習。」
入讀科大後，阿達在大學二年級才重新接觸足球，加入科大校隊。他有一個目標，希望能替文憑試學生渡過難關，遂立志成為老師，「自己喺中學上走咗唔少冤枉路，所以想令同學唔好好似我咁。」
文憑試失手，阿達（前排左一）決定自修重讀，最後入讀科大，重新接觸足球。（相片由受訪者提供）
正職教師 港足五人隊跟操半年
教師行業競爭激烈，阿達去年大學畢業，剛好找到空缺，負責教授科學和數學科。他原定下年修讀教育文憑，並轉到另一間中學教化學科。在疫情下，球場重開後，阿達每週有五日都踢足球，今次受傷可說是摧毀了他這幾年來的努力。
除了是區隊觀塘的球員外，劉俊達已在香港五人足球代表隊跟操半年。跟隊內的職業球員相比，他承認自己不太跟得上，「曾偉忠教練教得好好，學到好多嘢。我當學嘢，進步唔少。我成日俾佢鬧，因為真係跟唔上，五人足球要好細緻，用左定右腳都要好清晰。」
大學畢業後便找到工作，事業又初上軌道，有機會在香港五人足球代表隊跟操，但這一切都因為上星期的賽事而遭到打擊。記者問道，「其實係第一下王皓雲，定第二下而受傷？」
圖片截圖自Leon Wong影片
「望到自己左膝凹咗」
「其實係⋯⋯陳耀麟。」阿達踢的是翼峰，屬速度型球員，比賽場上較少正面碰撞，今次是首次嚴重受傷。「我畀佢（王皓雲）撞完，仲跑到去底線，我再向前跑，就聽到啪一聲，再向前跑多兩步，就望到自己左膝凹咗。」
「我只可以不斷叫，因為真係好驚，我聽到有人喺場邊叫插水。其實好恐怖，除咗嗌之外，乜都做唔到。」陳耀麟當時更雙手叉腰，嘲諷球證給他遲來的黃牌。劉俊達形容為好心寒，「嗰個人（陳耀麟）仲喺側邊講風涼話，可能佢係圈中大哥，但對我傷害都好大。」
劉俊達重提時意氣難平，更炮轟香港球證的執法水平低，指球證眼見自己膝蓋已移位變形，但仍只向陳耀麟給予黃牌了事，「先唔講我推入去係單刀定半單刀，佢後面咁樣踢腳，仲要傷到咁都唔紅？」
在白車送院後，醫生表示膝蓋骨斷裂，要動手術縫合，又表明手術後仍要用輔助器走路，須半年後能慢跑，一年後才有機會重返球場；身體的靈活程度亦會受影響。
遭逢嚴重受傷，家人十分擔心阿達，但媽媽其實一直不喜歡他踢足球，就是怕他受傷。阿達早幾日轉到私家醫院，公立醫院手術在兩星期後才有排期，而且環境較惡劣，骨科同房病人有不少是已截肢的糖尿病患者，「我幾晚都扎醒，瞓唔到。」
十多萬醫療費成為阿達負擔，幸得觀塘補助（相片由受訪者提供）
私家醫院手術連住院十多萬 積蓄一舖清袋
「我好慘，但係咪慘到咁呢？朋友話搞眾籌，但我唔想，唯有等可以返番工找數。」今次受傷令阿達經濟拮据，私家醫院預計出院埋單要十多萬元，還未計物理治療的費用。剛投身社會工作的阿達，無奈地說只能碌卡應付醫療費用，「fresh grad 可以有幾多錢剩？又唔知幾時返得工，今次將積蓄一舖清袋。」觀塘已預備一筆金錢作補償，以協助阿達渡過難關，「雖然唔係好多錢，但好有人情味。」
今次事件在連登討論區廣泛討論，有網民開了名為「香港乙組波咁撚樣踢人」的帖子。在受傷當晚，阿達正正在醫院病床上看著該帖。「有冇好嬲？心情好複雜。你話係咪好嬲，我呢一刻唔係好想理佢，點都好啦，都換唔返隻腳。」
「網民話報警同告佢（陳耀麟），我呢刻係唔想理佢，告咗都換唔返隻腳畀我。」說到這裡，記者的電話聽筒傳來阿達的哽咽，「打擊真係好大，原本一星期五日踢波，依家只能夠瞓喺度。見到佢畀人罰，我都唔會話好開心。」
觀塘今年有機會奪冠，最後與獎盃擦身而過。
表明積極面對 「Who fucking care 陳耀麟」
「我已經做得好好。喺觀塘做主力，入咗唔少波，差啲同球隊攞到冠軍。陳耀麟？Who fucking care 啦，嗰下一定唔係技術犯規。希望唔好再有呢啲傷害。我上年首年踢甲組，入到波，都叫達成到小夢想。對佢（陳耀麟）呢啲球員嚟講，可能覺得打哂飛機，但我嘅level 對我嚟講，進步已好大。對我嚟講，我可以入到訓練，著起港隊訓練波衫，都係夢想嚟⋯⋯。」阿達一邊說，一邊已泣不成聲，記者只能不住的安慰。
阿達明日將會進行手術，他表明會積極面對，「都可以話係幾黑暗嘅時期，我唔會講我好正面、無事，但只能見步行步，但最後一定OK嘅，只係好難捱，我相信我過到，我重讀都升到科大。」
記者：麥馬高