如馬友有收看本港體育節目或留意本港體育發展，李德能相信都不是一個陌生的名字，他除了是體育之友，更是有30年年資的馬鞍山之友。李德能一直以來和體育近乎劃上等號，而他的運動歷程，亦構成其馬鞍山生活的一個重要部分，就由德能兄在留了不少腳毛的馬鞍山海濱長廊慢慢講起。
李德能小時在九龍東頭邨長大，之後搬入新田圍做廣義的沙田友，九十年代尾選擇再「北上」在馬鞍山落腳，純粹出於實際考慮：要買樓。當時的準新郎李德能「市區住唔起，咪搵個平啲嘅地方囉」，剛發展不久的馬鞍山就成了他的目標。
馬鞍山樓價平 一住三十年
李生李太先搬入海栢花園，後來二人世界變成三人行，就搬去對面的新港城。當孩子漸大，要更多生活空間時，就搬到近海濱的海典居。「二街搬一街，一街搬三街」，一轉眼就三十年，李德能亦見證住由馬鞍山至西沙的屋苑一個個拔地而起，再加上2004年尾通車的馬鐵，更是成功連接整個馬鞍山區。
提起馬鞍山，不少人會立即聯想到美食沙漠，但同時又有不少馬友說搬入馬鞍山後不會再想搬出市區，這看似矛盾的講法，資深馬友李德能自然有其見解，「馬鞍山一直唔會好似市區交通咁方便，不過有一個好處，規劃較沙田新啲，人口密度同大廈高度都比較疏」。
樣樣都好舒服 唔想搬出去
就算與其他新市鎮比，馬鞍山都有不足之處，「我哋成日俾人笑美食沙漠，到而家都唔係話有咁多個地方食嘢、有好多商場。比起差唔多時間發展嘅將軍澳，我哋個規模係細好多，但我諗好多馬鞍山街坊都有個同感，住咗喺度就唔想搬返出去，樣樣嘢都好舒服，人又唔係好迫，成個區唔會好嘈雜，有條有理，除咗唔係乜都係落街就有之外，其他需要嘅嘢都好集中。」
至於老本行體育，李德能更有如百科全書般，對馬鞍山區內體育設施的優點如數家珍，例如逾20年歷史的馬鞍山體育館，是少數可辦國際體操賽和五人足球賽的場館，「可以擺晒男子（比賽）六個器材喺度」，更早時間落成的馬鞍山泳池「幾好用㗎，標準池、嬉水池都有」。至於就快30年歷史的馬鞍山公園，在李德能眼中同樣滿是優點，「以一個細嘅公園嚟講已經係好正，好多嘢都有，石春路、緩跑徑、大草地，最大特色係個小森林，模擬到遠足嘅山路」。
體育設施不足 自嘲「冇籃用」
不過對於區內略有不足的體育設施，李德能亦會「大聲疾呼」。早在2015年，他就在Facebook上載自己打籃球的相片，指紅日去打波，才10分鐘就「成場都係人」，到今日接受訪問時，仍自嘲是「冇籃用」，「全個馬鞍山有幾多個籃球場我可以數俾你聽，人口不斷增加，但籃球場比例並冇增加，由朝早到夜晚熄燈，（馬鞍山遊樂場）球場都有人」，結果他有時要到屋邨小學借用房署的籃球場止波癮。
正如上期《馬聞》指出，公屋屋邨都會配備籃球場，但房署的保養較康文署遜色，「籃框爛咗、冇網、歪晒，都冇乜人打理」，結果大家都較愛到康文署的球場，又回歸到上述的場地問題。
有追蹤李德能社交媒體的讀者應會留意到，他不時上載在海濱長廊跑步的打卡相，而身形亦在這幾年間有明顯變化。雖是資深體育主持，但李德能坦承，以往對跑步的第一個反應是「唔使預我」，只是上了年紀，始終都要找門運動來保持健康。相比「期間限定」的游水，跑步就是年中無休的選擇。
跑步可減磅 孤獨但不寂寞
在朋友指點下，2023年才「入坑」的李德能愈跑愈多，體重顯著回落之餘，亦發現跑步吸引之處，「跑步係冇分年紀」，而且可快可遠，「1000人一齊跑步，可以有幾百個目標」，而馬鞍山獨特之處，是可以隨意地跑，「一邊可以跑到沙田大圍，一邊向西沙」。在李德能眼中，跑步是一門孤獨但不寂寞的運動，因為身邊「男女老幼乜人都有」，漸漸地他都認得不同時段落場的跑友。
李德能這三十年馬友日子，一直都有運動相伴，一開始在大圍買單車直踩回馬鞍山，到馬鞍山游池落成後又可以去游水，如今一條海濱長廊連接整個馬鞍山，他已預期西沙項目完成後，「跑到去西貢又有幾奇！」馬鞍山一落街就可以跑步，而且不會人車爭路，又有多路線選擇，相比傳統的豪宅區，隨時要坐一程巴士才可到區內唯一的運動場跑步，李德能直言「你俾我住都冇乜大興趣」。
他一開始搬入馬鞍山，最直接是荷包的考慮，漸漸發現由生活到運動所需的，在馬鞍山都是伸手可及，「未試過感覺到住馬鞍山真係煩，不如搬返出去」。一個地區住足幾十年，1000人可以有幾百個原因，對李德能來說，就是運動令他選擇了馬鞍山。
撰文 // 謝頌昕
攝影 // Tong
社區報《馬聞》團隊是由一群關心馬鞍山的馬鞍山居民自發組成。
（本網歡迎各界投稿，文章內容為作者個人意見，並不代表本網立場。）