勞工及福利局局長羅致光今日（1月22日）下午召開記者會，講述「政府長者及合資格殘疾人士公共交通票價優惠計劃」（二元優惠計劃）延展至60-64歲人士嘅詳情。作為曾經於鐵路公司車站前線工作人員，以及於長者中心實習學生，政府所謂「優化措施」只係考慮點樣方便自己監察，忽略到上述措施執行上非常擾民。受影響人士不僅為長者（及其家人／照顧者），甚至影響公共交通營辦商職員以及各類社區服務單位。期望政府公佈具體措施之時，能檢視處理申請及享用優惠方式，能夠讓此德政真正做到「長者友善」。
(1) 個人八達通申請表格收集地點有限，現有22個指定港鐵及輕鐵客務中心根本無可能於短時間內收得晒全港約60萬60-64歲人士嘅申請。係咪應該考慮增加更多收集點處理「記名長者八達通」申請，以及簡化申請流程，減省客務中心職員工作量，以及乘客等候時間？
(2) 參考過往工作經歷，部分老友記發現自己唔記得帶長者八達通時，會考慮即時前往客務中心購買，以繼續享用兩蚊搭車優惠。與同樣需要使用個人八達通嘅學生比較，老友記自理同記憶能力相對無咁好。政府有必要制訂措施，以確保即使「記名長者八達通」遺留在家或遺失，老友記都唔會享用唔到有關福利。
又，部分保皇黨政客不斷強調發出全新長者八達通數目及比例遠超香港長者人口增長，從而歸咎及刻意「污名化」有好多不合資格人士（尤其係被淑清之流放棄嘅年輕人）濫用，無視唔少老友記即時購買多張新卡嘅情況，係非常無恥嘅講法。
(3) 羅致光於記者會上表示，日後老友記每次使用「記名長者八達通」，需要先向巴士車長或車站職員展示該卡。巴士載客量有限，車長尚算有空間望一望；但於集體運輸系統中，車站內有無咁多職員去檢查呢？對老友記而言，每次都要特登從銀包內攞張卡揚畀職員睇，會唔會增加跌卡風險？站長同意應該加強抽查以避免濫用，但又有無必要用一次都要揚一次？呢度歡迎大家討論。
世界衛生組織提出「全球老年友好城市建設」框架，在交通、乃至信息交流範疇上，建議社區內各持分者（當然包括政府部門及公共運輸機構）設計服務及設施時，應考慮長者需要。當中包括用詞簡單嘅書面信息、方便長者嘅服務地點等，讓長者唔會因無法獲得資訊而被孤立，融入社交生活。
個人認為政府提供更多福利，以惠及真正對社會有貢獻嘅老友記，本為德政。但呢一項針對長者嘅政策，操作上只考慮政府行政方便，一啲都唔「長者友善」，仲能夠稱得上為「德」政嗎？
延伸閱讀：
$2 乘車優惠放寬至60歲有暗湧 不如睇下依家情況？（2020年10月20日）
60-64歲$2乘車優惠 最快2022年第一季推行（2021年1月11日）
政府長者及合資格殘疾人士公共交通票價優惠計劃全面檢討最終報告（2021年1月）：
（英文版）
（中譯本）